11-დან 13 დეკემბრის ჩათვლით რუსეთში, მოსკოვში ქართული კულტურის დღეების ჩატარება იგეგმება. ორგანიზატორი რუსეთში შექმნილი ორგანიზაციაა - ფედერალური ქართული ეროვნულ-კულტურული ავტონომია რუსეთში.
როგორც მათ ვებ-გვერდზე გამოქვეყნებული განცხადებიდან ირკვევა, 11-13 ოქტომბერს გაიმართება კონფერენციები მიგრაციისა და ტრანსპორტის საკითხზე, ასევე, კულტურული ღონისძიებები - გამოფენები, ლექციები, ქართული კულინარიის მასტერკლასები და ა.შ.
ქართული კულტურის დღეები საკონცერტო დარბაზ კოსმოსში დასრულდება - განცხადების მიხედვით, კონცერში მონაწილეობას ქართული წარმოშობის შემსრულებლები და ქორეოგრაფიული ანსამბლები მიიღებენ.
ორგანიზაციის ცნობით, დეტალურ ინფორმაციას 1-ლი დეკემბრიდან საკუთარ ტელეგრამზე გამოაქვეყნებენ.
"რუსეთში ქართული ეროვნულ-კულტურული ავტონომიის" პრეზიდენტი ბათუმში დაბადებული დავით ცეცხლაძეა. ცეცხლაძის ბიოგრაფიაში ვკითხულობთ, რომ ის საქართველოს შსს-ს აკადემიაში სწავლობდა, შემდეგ კი სწავლა რუსეთში გააგრძელა. ვებ-გვერდზე გამოქვეყნებული ინფორმაციის მიხედვით, მან 2015 წელს "რუსეთ-საქართველოს ურთიერთობების აღორძინებისა და განვითარების ფონდი" დააფუძნა. ამავე ვებ-გვერდის მიხედვით, ის მოსკოვის მშვიდობის ფონდს მედლით ჰყავს დაჯილდოვებული - "რუსული სახელმწიფოს გაძლიერებისთის".
ორგანიზაციის გვერდზე გამოქვეყნებული ინფორმაციით, 2021 წლის 25 თებერვალს ცეცხლაძემ რუსეთის პრეზიდენტს, ვლადიმირ პუტინს საქართველოსთან პირდაპირი ავიამიმოსვლის თხოვნით მიმართა.
