რუსული სამთავრობო მედიის ინფორმაციით, ავიაგამანადგურებელ Су-34-ის ჩამოვარდნის მიზეზი ძრავში გაჭედილი 2 თოლია გახდა.
როგორც რუსული სამთავრობო მედია TASS-ი საკუთარ წყაროზე დაყრდნობით წერს, ერთ-ერთ ძრავში ხანძრის გაჩენა მასში თოლიების გაჭედვით იყო გამოწვეული.
"Су-34-ის ძრავში აფრენის დროს 2 თოლია იყო გაჭედილი - მათი ნაწილები ჩამოვარდნილი თვითმფრინავის შესწავლის დროს აღმოაჩინეს. ამან [თოლიების გაჭედვამ] გამოიწვია ხანძრის გაჩენა ერთ-ერთ ძრავში, რასაც შემდეგ თვითმფრინავის ჩამოვარდნა მოჰყვა". - ციტირებს მედია საკუთარ წყაროს.
ავიაგამანადგურებელი რუსეთის ქალაქ იეისკში 17 ოქტომბერს, კორპუსებთან ჩამოვარდა. შედეგად დაიღუპა 13 მოქალაქე, მათგან 3 ბავშვია. ასევე, ხანძრის კორპუსებზე გავრცელების შედეგად 19 ადამიანი დაშავდა.
რუსეთის თავდაცვის სამინისტროს ინფორმაციით, ჩამოვარდნამდე სამხედრო თვითმფრინავი სასწავლო-სავარჯიშო ფრენას ასრულებდა. შეჯახებამდე პილოტებმა Су-34-ის დატოვება მოახერხეს და თქვეს, რომ თვითმფრინავის ჩამოვარდნის მიზეზი აფრენისას ერთ-ერთი ძრავის აალება გახდა. Су-34-ის ჩამოვარდნასთან დაკავშირებით გამოძიება მიმდინარეობს.