თურქეთში, ბართინის პროვინციაში მაღაროში მომხდარ აფეთქებას, სულ მცირე, 28 ადამიანის სიცოცხლე ემსხვერპლა.
მაღაროში აფეთქება გუშინ, 14 ოქტომბერს მოხდა - შემთხვევის დროს ადგილზე, დაახლოებით, 110 ადამიანი 300 მეტრის სიღრმეზე იმყოფებოდა.
თურქეთის ჯანდაცვის მინისტრის, ფაჰრეთინ კოჩას ინფორმაციით, მაღაროდან 11 ადამიანი გამოიყვანეს - მათ სამედიცინო დახმარება უტარდებათ.
მაშველები მაღაროსთან მთელი ღამის განმავლობაში მუშაობდნენ - ცდილობდნენ, აფეთქების ადგილი ქვებისგან გაეწმინდათ, რათა გადარჩენილ ადამიანებამდე ჩაეღწიათ.
შინაგან საქმეთა მინისტრის, სულეიმან სოლუს ცნობით, აფეთქება, წინასწარი ინფორმაციით, დაახლოებით, 300 მეტრის სიღრმის ადგილზე მოხდა - 49 ადამიანი 300-დან 350 მეტრის სიღრმის ტერიტორიაზე "სარისკო" ზონაზე მუშაობდა.
"არიან ადამიანები, რომელთა ადგილიდან გამოყვანასაც ჯერჯერობით ვერ ვახერხებთ". - თქვა მინისტრმა.
აფეთქების მიზეზი, ჯერჯერობით, უცნობია, მომხდარზე გამოძიება დაიწყო.
