აშშ უკრაინას დამატებით 4 მაღალი მობილობის საარტილერიო-სარაკეტო სისტემას, HIMARS-ს გადასცემს. უსაფრთხოების დახმარების ახალი პაკეტი ოფიციალურად მიმდინარე კვირაში დაანონსდება. ამის შესახებ აშშ-ს თავდაცვის მდივანმა, ლოიდ ოსტინმა ისაუბრა.
"ახალი პაკეტი მოიცავს დამატებით ოთხ HIMARS, უახლეს სარაკეტო სისტემებს, რომლებსაც უკრაინა ასე ეფექტურად იყენებს და რომლებმაც დიდი გავლენა მოახდინეს ბრძოლის ველზე". – თქვა ოსტინმა.
უკრაინის შეიარაღებული ძალების მთავარსარდალმა, ვალერი ზალუჟნიმ 19 ივლისს აღნიშნა, რომ აშშ-ს მიერ მიწოდებული მაღალი მობილობის საარტილერიო-სარაკეტო სისტემები დროულად ჩამოვიდა და უკრაინელ ჯარისკაცებს ფრონტის ხაზზე პოზიციების შენარჩუნებაში ეხმარება.
გენერალმა ზალუჟნიმ თქვა, რომ უმაღლესი ხარისხის იარაღმა მის დანაყოფებს სიტუაციის სტაბილიზების საშუალება მისცა. ამავდროულად, უკრაინელი ჯარისკაცებისთვის HIMARS-ით მტრის სამეთაურო პუნქტებზე, საბრძოლო მასალისა და საწვავის საწყობებზე თავდასხმა გამარტივდა.
ზალუჟნის თქმით, იგი მუდმივ კავშირზა აშშ-ს გაერთიანებული შტაბის თავმჯდომარე, გენერალ მარკ მილისთან.
"ჩვენ მოვახერხეთ სიტუაციის სტაბილიზება. ამჟამად, სიტუაცია არის რთული, ინტენსიური, მაგრამ სრულიად კონტროლირებადი.
მნიშვნელოვანი ფაქტორი, რომელმაც ჩვენი დაცვის ხაზებისა და პოზიციების შენარჩუნება განაპირობა, M142 HIMARS-ის დროულად ჩამოსვლაა. იარაღი მტრის საკონტროლო პუნქტებზე, საბრძოლო მასალისა და საწვავის საწყობებზე მიზნობრივი დარტყმების საშუალებას იძლევა". - წერს ზალუჟნი Telegram-ზე.
აქამდე, რუსეთის თავდაცვის მინისტრის, სერგეი შოიგუს თქმით, მან ოკუპანტების ჯარს დასავლეთის მიერ უკრაინისთვის მიწოდებული რაკეტებისა და არტილერიის განადგურება უბრძანა.
