საქართველოს პრემიერმინისტრი, ირაკლი ღარიბაშვილი დეოლიგარქიზაციასთან დაკავშირებით წერილს აქვეყნებს, რომელშიც ქართული ოცნების დამფუძნებელ ბიძინა ივანიშვილთან მის კავშირზე საუბრობს და ამტკიცებს, რომ ივანიშვილს პარტიის მიერ გადაწყვეტილებების მიღებაზე გავლენა არ აქვს. პრემიერის შეფასებით, "შიდა და გარე ოპონენტების" მიერ დეოლიგარქიზაციაზე საუბარი მისთვის "განსაკუთრებით შეურაცხმყოფელია".
ღარიბაშვილი ასევე წერს, რომ დამკვირვებელს, შესაძლოა, მხოლოდ იმის ეჭვი გასჩენოდა, რომ ბიძინა ივანიშვილი საკვანძო გადაწყვეტილებების მიღებაში იყო ჩართული - რუსეთისთვის სანქციების არდაწესებასა და "ომში ქვეყნის არჩართვაში". მისივე მტკიცებით, თუ ვინმე ფიქრობს, რომ ეს ორი გადაწყვეტილება მმართველმა პარტიამ ივანიშვილის კარნახით მიიღო, " ძალიან ცდება, გუნდში ამ საკითხთან დაკავშირებით არავის რჩევა და კარნახი არ გვჭირდება".
ობიექტურ დამკვირვებელს შეიძლება დარჩეს მხოლოდ იმის თეორიული ეჭვი, რომ ბიძინა ივანიშვილი რაიმე კონკრეტული საკვანძო გადაწყვეტილებების მიღებაში შეიძლება ყოფილიყო ჩარეული. დღევანდელ მოცემულობაში, ასეთი საკვანძო გადაწყვეტილებები მხოლოდ ორი შეიძლება იყოს: რუსეთისთვის სანქციების არდაწესება და ომში ქვეყნის არჩართვა.
სანქციებისა და ომის თემაზე დღეს ბევრს არ ვისაუბრებ. ჩვენი პოლიტიკური გუნდის სხვა წევრების მსგავსად, ბუნებრივია, მეც მიწევს რაღაცებს გავუფრთხილდე. ვიტყვი მხოლოდ ერთს: თუ ვინმე ფიქრობს, რომ სანქციები ბიძინა ივანიშვილის კარნახით არ დავაწესეთ და ომშიც მისი კარნახით არ ჩავერთეთ, ძალიან ცდება. გუნდში ამ საკითხთან დაკავშირებით არავის რჩევა და კარნახი არ გვჭირდება. მიზეზი მარტივია - ჩვენც გვიყვარს ქვეყანა და საბედისწერო ომისთვის ის არც ჩვენ გვემეტება. შესაბამისად, ამ საკითხებზე გადაწყვეტილებები გუნდმა დამოუკიდებლად და სრული ერთსულოვნებით მიიღო.
როგორც უკვე აღვნიშნე, გუნდი არც ოპერატიულ და არც საკვანძო გადაწყვეტილებებს არ იღებს პოლიტიკიდან გასული ყოფილი ლიდერის კარნახით. ამ ვითარებაში, კამპანიის ავტორებმა კეთილი ინებონ და განმარტონ, რას გულისხმობენ, როდესაც ოლიგარქსა და დეოლიგარქიზაციაზე ლაპარაკობენ.
ბუნებრივია, ბიძინა ივანიშვილის ფაქტორი ქვეყანაში სერიოზულ როლს ასრულებს. მის ფაქტორზე საუბრისას, ქველმოქმედებას არც კი გავიხსენებ. ბიძინა ივანიშვილმა სწორედ მისი თავგანწირვითა და ახალი თამაშის წესების დამკვიდრებით მოიპოვა ის სიყვარული და პატივისცემა გუნდისგან და საზოგადოებისგან, რომელიც ჩვენს ოპონენტებს ასე ძლიერ აშფოთებთ. ბიძინა ივანიშვილის წარსულს და ამ წარსულზე დაფუძნებულ სიყვარულსა და პატივისცემას ჩვენი ოპონენტები ვერაფერს უხერხებენ, რაც მათ სასოწარკვეთილებაში აგდებს. ბიძინა ივანიშვილი ნაციონალური მოძრაობისა და მისი ლიდერების პირდაპირი ანტიპოდია, რასაც ხალხი ძალიან კარგად ხედავს და აფასებს.
თუ მათთვის პრობლემა ბიძინა ივანიშვილის ფაქტორი და, როგორც ასეთი, მისი არსებობაა, მაშინ ეს უნდა აღიარონ. თუ მათთვის პრობლემა ბიძინა ივანიშვილის მიერ დატოვებული ღირებულებები და თამაშის წესები - სამშობლოს სიყვარული და კანონის პატივისცემაა, კეთილი უნდა ინებონ და ესეც უნდა აღიარონ. ცნობიერი თუ ქვეცნობიერი იმედი იმისა, რომ, საჭიროების შემთხვევაში, ბიძინა ივანიშვილი ქვეყანას კიდევ ერთხელ დაუდგება გვერდში, შეიძლება ჩვენს გუნდსაც ჰქონდეს და საზოგადოებასაც. თუ ჩვენი ოპონენტები პრობლემას ამაში ხედავენ, ამასაც აღიარება სჭირდება.
წერილი სრულად - ნახეთ აქ.
ევროკავშირის წევრობის კანდიდატის სტატუსის მისაღებად საქართველომ 12 პუნქტი უნდა შეასრულოს, რომელიც ევროკომისიამ შეადგინა. ევროკომისიამ პირობებს შორის ქვეყნის დეოლიგარქიზების ვალდებულებაც შეიტანა. გამოქვეყნებული ანგარიშის მიხედვით, კანდიდატი ქვეყნის სტატუსის მიღებამდე, ქვეყანამ ეკონომიკურ, პოლიტიკურ და სოციალურ სფეროებში გავლენებისგან გათავისუფლება უნდა შეძლოს.
"ეკონომიკურ, პოლიტიკურ და სოციალურ სფეროებში გადაჭარბებული გავლენების აღმოფხვრის გზით "დეოლიგარქიზების" ვალდებულების შესრულება". - ნათქვამია შეფასებით ანგარიშში.
