რუსეთის საგარეო საქმეთა მინისტრი, სერგეი ლავროვი მისი რეისისთვის სერბეთის მეზობელი ქვეყნების მიერ ცის ჩაკეტვას "წარმოუდგენელს უწოდებს" და დასავლეთს სერბეთისთვის საგარეო პოლიტიკის წარმოების "უფლების ჩამორთმევაში" ადანაშაულებს.
"რა თქმა უნდა, წარმოუდგენელი რამ მოხდა და მესმის ინტერესი, რომელსაც იჩენთ ამ აღმაშფოთებელ ქმედებებზე ჩვენი შეფასების მიმართ. სუვერენულ სახელმწიფოს საგარეო პოლიტიკის განხორციელების უფლება ჩამოართვეს. სერბეთის საერთაშორისო საქმიანობა რუსეთის მიმართ დაბლოკილია". - თქვა ლავროვმა.
სერბეთის სამმა მეზობელმა ქვეყანამ: ბულგარეთმა, ჩრდილოეთ მაკედონიამ და მონტენეგრომ რუსეთის საგარეო საქმეთა მინისტრის, სერგეი ლავროვის სერბეთისკენ მიმავალ თვითმფრინავს საკუთარი საჰაერო სივრცის გამოყენების უფლება არ მისცა. ლავროვის რეისმა დანიშნულების ადგილამდე ვერ ჩააღწია და უკან დაბრუნება მოუწია.
რუსეთის უკრაინაში შეჭრის გამო, რუსეთს ევროკავშირმა და დიდმა ბრიტანეთმა საჰაერო ფრენებზე შეზღუდვები დაუწესეს და ცა ჩაუკეტეს.
ინფორმაცია, ლავროვის ვერშემდგარი ვიზიტის შესახებ, რომელიც თავდაპირველად სერბულმა მედია Вечерние Новости-მ გაავრცელა, დაადასტურა რუსეთის საგარეო საქმეთა სამინისტროს სპიკერმა, მარია ზახაროვამ. მისი თქმით, ლავროვის რეისს ევროკავშირისა და NATO-ს ქვეყნებმა საჰაერო სივრცე დაუხურეს.
რუსეთის დელეგაცია ბელგრადში მოლაპარაკებებისთვის მიფრინავდა.
რუსული სამთავრობო მედიის ცნობით, ლავროვი სერბეთში ვიზიტის ნაცვლად გამართავს პრესკონფერენციას "აქტუალურ საკითხებზე".
რუსეთის ფედერაციულ საბჭოში სერბეთის მეზობელი ქვეყნების მიერ ცის ჩაკეტვაზე "მკაცრ რეაქციასა" და არა მხოლოდ დიპლომატიურ, არამედ "კონკრეტულ, პრაქტიკულ საპასუხო ქმედებებს" ითხოვენ.
