Institute for the Study of War-ის ანგარიშის მიხედვით, რუსეთის სევეროდონეცკისა და დონბასის დაკავებაზე კონცენტრაცია ხერსონის ოლქში ოკუპანტების პოზიციებს კითხვის ნიშნის ქვეშ აყენებს. ხერსონი მნიშვნელოვანი ტერიტორიაა, რადგან ეს უკრაინაში ერთადერთი ადგილია, სადაც ოკუპანტები მდინარე დნიპროს დასავლეთ სანაპიროს აკონტროლებენ. თუ რუსეთი ხერსონში პოზიციების შენარჩუნებას შეძლებს, ის მეტად გაძლიერდება, ხოლო თუ უკრაინა ხერსონს დაიბრუნებს, მომავალი თავდასხმისგან თავის დაცვა უკეთ შეეძლება.
უკრაინის სამხედრო ძალებმა, როგორც ჩანს, სევეროდონეცკის დატოვება დაიწყეს, რაც რუსებს ქალაქში სწრაფი წინსვლის საშუალებას მისცემს. უკრაინამ უნდა შეინარჩუნოს თავისი უფრო შეზღუდული რესურსები და ფოკუსირდეს არა ტერიტორიის დაცვაზე, არამედ კრიტიკული ტერიტორიების დაბრუნებაზე.
რუსული ძალები, სავარაუდოდ, უკრაინაში მძიმე მატერიალური დანაკარგების კომპენსაციისთვის ბელარუსის ტექნიკის რეზერვების გამოყენებას ცდილობენ. უკრაინის გენერალური შტაბის ინფორმაციით, ბელარუსის ძალებს საბრძოლო დანაკარგების შესავსებად ტანკები და ქვეითთა საბრძოლო მანქანები თავიანთი საწყობებიდან რუსეთში გადააქვთ. ეს ანგარიში ადასტურებს წინა ცნობას, რომ რუსეთის სამხედრო ძალებმა მეტწილად ამოწურეს საკუთარი რეზერვები და მიუთითებს, რომ კრემლი კვლავ იყენებს გავლენას ბელარუსზე, რათა სამხედრო ტექნიკა მოიპოვოს.
რუსეთის სამხედრო ძალები მაღალი სიზუსტის შეიარაღების დეფიციტს განიცდიან. უკრაინის გენერალური შტაბის ინფორმაციით, მაღალი სიზუსტის იარაღის მზარდი ნაკლებობის გამო, ოკუპანტები თვითმფრინავების გამოყენებას განაგრძობენ. უკრაინის მთავარმა სადაზვერვო სამმართველომ (GUR) აღნიშნა, რომ რუსეთის მაღალი სიზუსტის მარაგის 60%-მდე უკვე ამოწურულია.
რუსეთის სამხედრო წრეებში შიდა უთანხმოება, იმის მტკიცებით, რომ ომის მოსაგებად კრემლი საკმარისს არ აკეთებს, კვლავ იზრდება. რუსეთის უშიშროების ფედერალური სამსახურის (FSB) ყოფილმა ოფიცერმა, იგორ გირკინმა (ასევე ცნობილი, როგორც სტრელკოვი) დაგმო რუსეთის საგარეო საქმეთა მინისტრის, სერგეი ლავროვის განცხადებები უკრაინაში "სპეციალური ოპერაციის" პრიორიტეტად დონბასის გათავისუფლების შესახებ. გირკინი ამტკიცებდა, რომ კრემლმა უარი თქვა კონფლიქტის იდეოლოგიურ საფუძვლებზე, რაც მთელ უკრაინაზე ფოკუსირებას უკავშირდება.
- ოკუპანტები სევეროდონეცკის შიგნით და მის გარშემო ტერიტორიული წინსვლის მიღწევას ცდილობენ.
- ოკუპანტები სევეროდონეცკის ალყის გასაძლიერებლად ჩრდილოეთით პოზიციების გაძლიერებას ცდილობენ.
- რუსეთის სამხედრო ძალები უკრაინის თავდასხმების წინააღმდეგ, სავარაუდოდ, დონეცის დასავლეთით, მდინარე სივერსკში პოზიციების დაკავებას შეეცდებიან.
- ოკუპანტები მარიუპოლში ფილტრაციისა და დეპორტაციის პროცედურებს აძლიერებენ.
დიდი ადამიანური დანაკარგის ფონზე, რუსეთის სამხედრო ძალები, შესაძლოა, უკრაინის მოქალაქეების ომში გაწვევას გეგმავდნენ. უკრაინის სადაზვერვო სამმართველოს ინფორმაციით, რუსეთის საოკუპაციო ძალები ოკუპირებულ ზაპოროჟიასა და ხერსონის ოლქებში ფსევდო-რეფერენდუმების გამართვას აპირებენ, რათა იძულებითი მობილიზაცია გამოაცხადონ და "მობილიზებული" უკრაინელები ფრონტის ყველაზე ცხელ წერტილებში გაუშვან. თუ გავრცელებული ინფორმაცია სიმართლეს შეესაბამება, ეს რუსეთის სამხედრო ძალების წინააღმდეგ დამატებით პროტესტისა და პარტიზანული მოქმედებების გახშირებას გამოიწვევს.
რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო.პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ "უკრაინული აგრესიის" მოგერიებაში. უკრაინაში შეჭრის პარალელურად, მსოფლიოს წამყვანი ქვეყნები რუსეთს სხვადასხვა სახის სანქციას უწესებენ.
