პოლიტიკური კრიზისი

დეგნანი: შეთანხმება ღიად რჩება ინდივიდებისთვის ხელმოსაწერად, გვსურს, რაც შეიძლება ფართო იყოს

აშშ-ს ელჩი საქართველოში კელი დეგნანი ულოცავს მხარეებს შეთანხმებას, თუმცა ამასთანავე გამოთქვამს სურვილს, რომ ეს შეთანხმება იყოს უფრო ფართო. 

"ეს შეთანხმება ღიად რჩება ინდივიდუალური დეპუტატებისთვის ხელმოსაწერად,  ჩვენ გვინდა, ეს შეთანხმება იყოს რაც შეიძლება ფართო, რათა ვაჩვენოთ, რომ საქართველომ გადადგა დიდი ნაბიჯი მომავლისთვის, მისი ევროატლანტიკური მისწრაფებისთვის.

ეს არის მნიშვნელოვანი ნაბიჯი, თუმცა წინ კიდევ ბევრი საქმეა. მე მჯერა, რომ ეს ქვეყანა გააგრძელებს წინსვლას და ყველა პარტია შემოვა პარლამენტში, რათა გააძლიეროს საქართველოს ინსტიტუციები". – ამბობს კელი დეგნანი.

პრეზიდენტის სასახლეში ოპოზიციური პარტიების ნაწილმა და ქართულმა ოცნებამ  ხელი მოაწერეს ევროპული საბჭოს პრეზიდენტის, შარლ მიშელის დოკუმენტს - საქართველოს წინსვლის გზა.

ოპოზიციური პარტიებიდან ხელი მოაწერეს ლელომ (ბადრი ჯაფარიძე, მამუკა ხაზარაძე), სტრატეგია აღმაშენებელმა (გიორგი ვაშაძე), გირჩმა (ვახტანგ მეგრელიშვილი), გირჩი-მეტი თავისუფლებამ (ზურაბ ჯაფარიძე), მოქალაქეებმა (ალეკო ელისაშვილი), რესპუბლიკურმა პარტიამ (ხათუნა სამნიძე), ასევე, ინდივიდუალურად მოაწერეს ხელი არჩეულმა დეპუტატმა დავით ბაქრაძემ და ენმ-ის წევრმა სალომე სამადაშვილმა.

ქართული ოცნებიდან  ხელი მოაწერეს არჩილ თალაკვაძემ და შალვა პაპუაშვილმა.

შარლ მიშელის დოკუმენტს ხელი არ მოაწერეს ერთიანმა ნაციონალურმა მოძრაობამ, ევროპულმა საქართველომ და ლეიბორისტულმა პარტიამ. ენმ-ს განცხადებით, მოლაპარაკების სივრცის გასახსნელად აუცილებელია ნიკა მელიას უპირობოდ, გირაოს გარეშე გათავისუფლება.

ევროპული საქართველოს ლიდერის, გიგა ბოკერიას თქმით კი,  "ჩვენს სიტყვას აქვს ფასი, როცა რაღაცას ვამბობთ, იმას ვაკეთებთ". მან აღნიშნა, რომ თვითმმართველობის არჩევნების შედეგებზე ვადამდელი არჩევნების მიბმა არასწორია და ეს საკითხი გამოსასწორებელია. 

კომენტარები