რუსეთის პრეზიდენტის ინიციატივით, საპროტესტო აქციების დროს ძალოვანების დაუმორჩილებლობაზე სანქციები გამკაცრდება.
ვლადიმირ პუტინმა ადმინისტრაციულ სამართალდარღვევათა კოდექსში ცვლილებებს ხელი 24 თებერვალს მოაწერა.
ამიერიდან, ძალოვანი სტრუქტურების დაუმორჩილებლობა, ფიზიკური პირებისთვის, 500-1000 რუბლის ნაცვლად, 2-4 ათასი რუბლით დაჯარიმებას გაითვალისწინებს. სანქციების სიას ასევე ემატება სავალდებულო საზოგადოებრივი სამუშაოები, 40-120 საათის ხანგრძლივობით.
დაუმორჩილებლობის აქტის განმეორების შემთხვევაში პირი 10-20 ათასი რუბლით დაჯარიმდება. ამ ეტაპისთვის, სამართალდამცავებისთვის წინააღმდეგობის გაწევისთვის არსებული უმაღლესი სანქცია კვლავ 30-დღიან პატიმრობას მოიაზრებს.
გაიზარდა ჯარიმები აქციების ჩატარების წესის დარღვევისთვისაც. მაგალითად, ფინანსური დახმარების გაწევა აქციების იმ ორგანიზატორებისათვის, რომელთაც პროტესტის გამოხატვა ამ ფორმით აკრძალული აქვთ (მაგალითად, უცხო ქვეყნის მოქალაქეებს), ფიზიკური პირის 10-15 ათასი რუბლით დაჯარიმებას გამოიწვევს. ანალოგიური დარღვევისთვის იურიდიული პირები 50-100 ათასი რუბლით დაჯარიმდებიან.
