მთავრობის ადმინისტრაციაში უწყებათაშორისი საკოორდინაციო საბჭოს სხდომის შემდეგ გამართულ ბრიფინგზე ჯანდაცვის მინისტრის მოადგილე თამარ გაბუნიამ თქვა, რომ საველე ჰოსპიტლების მოწყობა არ იგეგმება. მისივე თქმით, დაგეგმილია რესპუბლიკურ საავადმყოფოში სარეზერვო საწოლფონდის მომზადება:
"რესპუბლიკურ საავადმყოფოში იქმნება დამატებითი საწოლფონდი, რომელიც მალე იქნება მზად ოპერირებისთვის. ამ ეტაპზე საჭიროება არ არის, თუმცა მომდევნო ტალღებისთვის სარეზერვო საწოლფონდი იქნება კიდევ დამატებით 300-დან 400 საწოლამდე". – თქვა მან.
რაც შეეხება შეზღუდვებს, მან თქვა, რომ საბჭო დააკვირდება მომდევნო 2 კვირის განმავლობაში ეპიდსიტუაციას და 1 800 ახალი შემთხვევა მიუთითებს იმას, რომ გავრცელება არის აქტიური.
"კი განახევრდა შეზღუდვების ფონზე შემთხვევების რიცხვი, მაგრამ საყურადღებოა დადებითობის მაჩვენებელი, რაც არის 11% და მეტი. დადებითობის მაჩვენებელი ნიშნავს იმას, რამდენი ადამიანი ვლინდება კოვიდით, როდესაც ხდება გამოკვლევა. ეს მაჩვენებელი როდესაც არის 5%-ზე მეტი, ნიშნავს იმას, რომ გავრცელება არის საკმაოდ ინტენსიური და შეიძლება უფრო მეტი ადამიანია ინფიცირებული, ვიდრე ჩვენ დღეს ტესტირების შედეგად ვავლენთ". – თქვა მან.
6 იანვრის დილის მონაცემებით, ქვეყანაში ჯამში ინფიცირების 233 879 შემთხვევაა დადასტურებული, მათგან 223 276 პაციენტი გამოჯანმრთელდა, 2 666 კი გარდაიცვალა.
გასულ 24 საათში საქართველოში კორონავირუსით ინფიცირების 1 800 შემთხვევა დადასტურდა, გარდაიცვალა კიდევ 20 ადამიანი. გამოჯანმრთელდა 489 პაციენტი.