საქართველოში აშშ-ს საელჩო ოფიციალურ Facebook გვერდზე განცხადებას აქვეყნებს, რომელშიც ნათქვამია, რომ ამერიკული სამხედრო ხომალდი "დონალდ კუკი" შავ ზღვაში რეგიონული სტაბილურობის მხარდამჭერი რუტინული საზღვაო უსაფრთხოების ოპერაციების ჩასატარებლად შემოვიდა.
"შავ ზღვაში ოპერირება რეგიონში ჩვენი პარტნიორებისა და მოკავშირეებისადმი ერთგულების მანიშნებელია. ეს მნიშვნელოვანი დიპლომატიური მისიაა და „დონალდ კუკს" მრავალჯერ გამოუცდია შავი ზღვის ქვეყნების სტუმართმოყვარეობა". – განაცხადა ხომალდის მეთაურმა, კელი ჯოუნსმა.
აშშ-ს საელჩოს განცხადების მიხედვით, შავი ზღვის რეგიონში აგრესიული აქტორების შეკავება მსოფლიოს ინტერესშია:
"აშშ-ის საზღვაო ძალები შავ ზღვაში რუტინულ ოპერაციებს ნატოს მოკავშირე და პარტნიორ ქვეყნებთან ერთად ატარებს. მათ შორისაა: ბულგარეთი, საქართველო, რუმინეთი, თურქეთი და უკრაინა. მსოფლიოს ინტერესებშია, რომ შეინარჩუნოს სტაბილური, წარმატებული შავი ზღვის რეგიონი და შეაკავოს აგრესიული აქტორები, რომლებიც საკუთარი მიზნებისთვის დესტაბილიზაციას ცდილობენ."