საქართველოს პრემიერმინისტრის გიორგი გახარიას თქმით, მთავრობა ბათუმის ჩაკეტვას, კორონავირუსის მომატებული შემთხვევების გამო, არ განიხილავს.
"არ განიხილება, ბათუმი არ ჩაიკეტება". – ამბობს პრემიერი.
ბათუმში, დანარჩენ საქართველოსთან შედარებით, ახალი კორონავირუსის შემთხვევების მკვეთრი მატება აღირიცხება.
ინფიცირების შემთხვევები ბათუმში ერთერთ საკონდიტრო მაღაზია დონას უკავშირდება.
დღეს, 7 სექტემბერს გამოვლენილი კორონავირუსის 34 ახალი შემთხვევიდან 20 აჭარაში დადასტურდა.
თბილისის ინფექციური საავადმყოფოს სამედიცინო დირექტორის მარინა ეზუგბაიას ცნობით, კორონავირუსის 34 ახალი შემთხვევიდან 6 - საკონდიტრო "დონას" უკავშირდება, 8-ს კი აჭარაში მოგზაურობის ისტორია აქვს.
დონას ერთერთი თანამშრომლის დაინფიცირების შესახებ ცნობილი 1 სექტემბერს გახდა. მოგვიანებით ახალი კორონავირუსი საკონდიტრო დონას კიდევ ერთ თანამშრომელს და ასევე, მეპატრონესაც დაუდასტურდა. ამ დროისთვის ფარნავაზ მეფის ქუჩაზე მდებარე ფილიალი დაკეტილია, თანამშრომლები კი კარანტინში არიან გადაყვანილები.