ჭავჭავაძის გამზირზე საზოგადოებრივი ტრანსპორტი საპირისპირო მიმართულებით მოძრაობს [გალერეა]

ილია ჭავჭავაძის გამზირზე პირველი აგვისტოდან ავტობუსებმა და სამარშუტო ტაქსებმა ახლად გამოყოფილ, სპეციალურ ზოლებში განახლებული სქემით დაიწყეს მოძრაობა. მე-2 და მე-3 ზოლში საზოგადოებრივი ტრანსპორტი საწინააღმდეგო მიმართულებით მოძრაობს. ამ ზოლებში მხოლოდ ავტობუსები და სამარშუტო ტაქსები ივლიან.

აღსანიშნავია, რომ ამჟამად სხვა ავტომობილები პირველ და მეოთხე ზოლში ძველებური მიმართულებით მოძრაობენ. 

თბილისის მერიის გაანგარიშებით ავტობუსების ზოლებისა და გაჩერებების ქუჩების შუა ზოლში გადატანით, როგორც ეს ჭავჭავაძის გამზირზე მოხდა, ხუთასი მილიონი ლარი იზოგება.

მერიის ტრანსპორტის და ურბანული განვითარების სააგენტოს ხელმძღვანელის, ვიქტორ წილოსანის თქმით, უშუალოდ ჭავჭავაძეზე ავტობუსები შუა ზოლში იმიტომ მოეწყო, რომ გამზირზე ბევრი გადამკვეთი ქუჩაა და ავტობუსებს ხშირად უწევდათ შეჩერება.