ბოჭორიშვილის სახელობის კლინიკის სამეთვალყურეო საბჭოს თავმჯდომარე, მაკა სოლოღაშვილი ამბობს, რომ კვირაზე მეტია, კლინიკის რეანიმაციულ განყოფილებაში კორონავირუსით ინფიცირებული არცერთი პაციენტი აღარ მკურნალობს.
"პაციენტის კრიტიკული მდგომარეობა არ გვქონია, მძიმე პაციენტი გვყავდა. [...] პაციენტები დასტაბილურებული მდგომარეობით გადავიდნენ და აგრძელებენ თერაპიულ მკურნალობას", - თქვა სოლოღაშვილმა.
მისივე ინფორმაციით, კლინიკაში კორონავირუსისგან კიდევ 1 ადამიანი გამოჯანმრთელდა, 3 ბავშვის გამოჯანმრთელებას კი ელოდებიან.
ბოჭორიშვილის სახელობის კლინიკაში COVID-19 32 ადამიანს აქვს დადასტურებული, მათგან 11 ბავშვია. დღეს, 27 მაისს, სოლოღაშილის თქმით, ახალი შემთხვევა არ დადასტურებულა.
ბოლო მონაცემებით, საქართველოში კორონავირუსით ინფიცირების 735 შემთხვევაა დადასტურებული, მათგან 557 ადამიანი გამოჯანმრთელდა, 12 პაციენტი გარდაიცვალა.