პირველი საუნივერსიტეტო კლინიკის დირექტორის ლევან რატიანის ინფორმაციით, ამ ეტაპზე კლინიკაში სულ 106 პაციენტი მკურნალობს, კორონავირუსის ინფექცია კი 81 მათგანს აქვს დადასტურებული.
რატიანის თქმით, დღეს კლინიკიდან 9 გამოჯანმრთელებული პაციენტი ეწერება.
"დღეს ეწერება 9 პაციენტი. ასევე, გაგზავნილი გვაქვს რამდენიმე პირველადი ტესტი და ველოდებით პასუხებს. რეანიმაციაში გვყავდა 8 მძიმე პაციენტი, მათი მდგომარეობა რჩება სტაბილური. ზოგიერთ მათგანთან გამოხატულია დინამიკა და მზადდებიან ფილტვის ხელოვნური ვენტილაციიდან მოხსნისთვის. დღითიდღე გაწერილი პაციენტების რაოდენობა იზრდება, რაც ძალიან გვახარებს", - თქვა რატიანმა.
ბოლო მონაცემებით, ქვეყანაში კორონავირუსის 517 შემთხვევაა დადასტურებული. 168 ადამიანი გამოჯანმრთელდა, 6 პაციენტი გარდაიცვალა.
კარანტინის რეჟიმში 5 153 ადამიანია, სტაციონარში მეთვალყურეობის ქვეშ - 549.
