წყალტუბოში კორონავირუსის პირველი შემთხვევა დადასტურდა. 62 წლის კაცი წყალტუბოს მერიის დასუფთავების სამსახურის თანამშრომელია. ის ქუთაისის ინფექციურ საავადმყოფოშია გადაყვანილი.
კაცის ოჯახის წევრები სამართალდამცველებმა კარანტინში გადაიყვანეს.
დაავადებათა კონტროლის ეროვნული ცენტრის წარმომადგენელი რუსთავი 2-თან ამბობს, რომ ეპიდკვლევა ღამით დაიწყო. კაცს 10-ზე მეტ ადამიანთან ჰქონდა კონტაქტი და ისინი იდენტიფიცირებულები არიან. მისივე თქმით, სიმპტომების მქონე პირებს შესაბამისი ლაბორატორიული კვლევები ჩაუტარდებათ.
"რაც შეეხება უშუალოდ ოჯახის წევრების კონტაქტს. ამაზე მუშაობა მიმდინარეობს და შესაბამისად მივიღებთ გადაწყვეტილებას"- ამბობს გოჩა გიორგაძე.
საქართველოში COVID-19-ით ინფიცირების 511 ფაქტია დადასტურებული, მათგან 156 ადამიანი გამოჯანმრთელდა, 6 პაციენტი გარდაიცვალა.