აქტივისტებმა ჯაჭვით და ბოქლომით ჩაკეტეს კარი, საიდანაც სპეცრაზმელები უნდა გამოვიდნენ. თუმცა, სპეციალური დანიშნულების რაზმები პარლამენტის შენობის გარე პერიმეტრზეც იმყოფებიან.
აქტივისტებს მოლოდინი აქვთ, რომ მათ დაშლიან - დემონსტრანტებს პარლამენტის ყველა შესასვლელი ბლოკირებული აქვთ.
სპეციალური დანიშნულების რაზმები მობილიზებულები არიან რეპუბლიკის მოედანზეც. 
ფოტო: ტაბულა
ფოტო: მთავარი არხი
ასევე, ქართული ოცნების წევრებმაც თქვეს, რომ სამართალდამცველებმა უნდა უზრუნველყონ საკანონმდებლო ორგანოს ფუნქციონირება.
სამი დღეა, პარლამენტთან საპროტესტო აქციები მიმდინარეობს. ოპოზიცია და სამოქალაქო საზოგადოება ვადამდელ არჩევნებს გერმანული მოდელით, დროებით მთავრობას და ცესკოს განახლებულ შემადგენლობას ითხოვს.
გუშინ საღამოდან ჩაკეტილია პარლამენტის ყველა შესასვლელი - აქციის მონაწილეებს გაშლილი აქვთ კარვები. ოპოზიციონერები და სამოქალაქო აქტივისტები ამბობენ, რომ სანამ მათი მოთხოვნა არ შესრულდება, დეპუტატებს პარლამენტში არ შეუშვებენ და მუშაობის საშუალებას არ მისცემენ.
პარლამენტთან აქციები მას შემდეგ განახლდა, რაც ქართული ოცნების უმრავლესობამ პროპორციულ სისტემაზე გადასვლის შესახებ კანონპროექტი ჩააგდო. ამით ბიძინა ივანიშვილმა და მმართველმა გუნდმა არ შეასრულა 24 ივნისს გაცემული დაპირება, რომ 2020 წლის არჩევნები პროპორციული წესით ჩატარდებოდა. დაპირება ივანიშვილმა 20-21 ივნისის ღამეს განვითარებული მოვლენების და მომდევნო დღეების მასშატბური პროტესტის შემდეგ გასცა.
