3 აგვისტოს 14:00 საათზე მოსკოვში სამართლიანი არჩევნების მოთხოვნით აქციის გამართვა არის დაგეგმილი. ამჟამად ადგილზე პოლიციელების და რუსეთის გვარდიის სხვადასხვა ჯგუფის მობილიზება მიმდინარეობს. ადგილზე დაკავებული მონაწილეებისთვის განკუთვნილი რამდენიმე ავტობუსიც არის. პოლიციელების ნაწილი აქციის მონაწილეებისთვის გზის ჩასაკეტად ემზადება.
Twitter-ის მომხმარებლები წერენ, რომ აქციის დაწყებამდე 1 საათით ადრე პოლიცია გამვლელებს უკვე ჩხრეკს. მედიის Mesiazona ჟურნალისტის თქმით, შეკრების ადგილას ახლადმისულს პოლიციამ დოკუმენტზე ხელის მოწერა მოთხოვა, სადაც წერია, რომ არაავტორიზებულ აქციაში მონაწილეობის მიღებაზე პოლიციამ გააფრთხილა.
აქციის Facebook Event-ზე ვხედავთ, რომ 20 000-ზე მეტი ადამიანი მიდის ან დაინტერესებულია.
მოსკოვის პროკურატურამ 3 აგვისტოს დაგეგმილი აქციის ორგანიზატორები გააფრთხილა და მათ მოუწოდა, რომ კანონის დარღვევა დაუშვებელია.
დამოუკიდებელი კანდიდატები მოსკოვში 14 ივლისიდან საპროტესტო აქციებს მართავენ, რადგან ისინი მოსკოვის საკრებულოს არჩევნებზე დაუშვან. მოსკოვის ცენტრალური საარჩევნო კომისიის ოფისთან გამართული აქციის შემდეგ საგამოძიებო კომიტეტმა საარჩევნო კომისიის საქმიანობაში ხელის შეშლის მუხლით გამოძიება დაიწყო.
27 ივლისს აქცია მოსკოვის მერიასთან გაიმართა, რომელიც ადგილობრივ ხელისუფლებასთან შეთანხმებული არ იყო. ის პოლიციამ და რუსეთის გვარდიამ ძალადობრივად დაშალა. საერთო ჯამში სამართალდამცავი ორგანოების წარმომადგენლებმა 1 300-ზე მეტი ადამიანი დააკავეს, მათ შორის ოპოზიციური პოლიტიკოსები და ჟურნალისტები. 27 ივლისის აქციაზე პროკურატურამ საქმე პოლიციელებისადმი ძალის გამოყენების მუხლით აღიძრა. ამ დროის მონაცემებით, გამამტყუნებელი განაჩენი აქციის 5 მონაწილის მიმართაა გამოტანილი.
ლიუბოვ სობოლმა მოსახლეობას მოუწოდა, რომ 3 აგვისტოს მშვიდობიან მსვლელობას შეუერთდნენ. მოსკოვის ხელისუფლება აცხადებს, რომ აქციაზე ნებართვას არ გასცემენ.