სახლი, სადაც ამერიკული სერიული მკვლელის ჩარლზ მენსონის მიმდევრებმა მენსონის ბრძანებით მეპატრონეები ლენო და როუზმერი ლაბიანკები მოკლეს, 1.98 მილიონ დოლარად იყიდება.
მეპატრონეები მენსონის მიმდევრებმა 1969 წელს რომან პოლანსკისა და შარონ ტეიტის მკვლელობიდან მეორე დღეს მოკლეს.
Washington Post-ის ცნობით, სახლს ორი საძინებელი, 1.5 აბაზანა აქვს და საცურაო აუზი აქვს. სახლი უკვე ორი კვირაა იყიდება და ეს ფაქტი კვენტინ ტარანტინოს ჩარლზ მენსონზე გადაღებული ფილმის გამოსვლას ემთხვევა. უკანასკნელად ლაბიანკების სახლი 1998 წელს იყიდებოდა.
უძრავი ქონების აგენტის თქმით, მიუხედავად ამ სახლში მომხდარი ფაქტებისა, ხალხს მისი ყიდვა მაინც აინტერესებს და ამის მსურველიც ბევრია.
ჩარლზ მენსონი მე-20 საუკუნის ერთ-ერთი ყველაზე ცნობილი სერიული მკვლელი იყო.
1960-იან წლებში ჩარლზ მენსონის მიმდევრებმა ჩამოაყალიბეს "მენსონის ოჯახი" და 9 ადამიანი მოკლეს, მათ შორის იყო ყველაზე გახმაურებული "ტეიტ-ლაბიანკების" საქმე, როდესაც კალიფორნიაში, ორ ღამეში მიმდევრებმა 7 ადამიანი მოკლეს.
რომან პოლანსკის ორსული ცოლი, შერონ ტეიტი, მენსონის ერთ-ერთმა ახალგაზრდა მიმდევარმა საკუთარ სახლში მოკლა და მისი სისხლით სახლის კარს "ღორი" დააწერა. იმავე დღეს ტეიტის სახლში 4 ადამიანი მოკლეს. შემთხვევის შემდეგ დღეს, ლოს ანჯელესში, "მენსონის ოჯახის" წევრებმა მოკლეს ლენო და როუზმერი ლაბიანკები.
თავად ჩარლზ მენსონი ამ შემთხვევებში არ მონაწილეობდა, მაგრამ იგი დამნაშავედ ცნეს მისი მიმდევრებისთვის მკვლელობის ბრძანებების გაცემის გამო. 1971 წელს მას სიკვდილით დასჯა მიუსაჯეს.
სანამ მენსონის სასიკვდილო განაჩენს შეასრულებდნენ, კალიფორნიის შტატში სიკვდილით დასჯა აიკრძალა, რის გამოც მას სამუდამო პატიმრობა შეეფარდა. ციხეში გატარებული ათწლეულების მანძილზე, მენსონმა შეწყალება 12-ჯერ უშედეგოდ მოითხოვა. საბოლოოდ, ის 83 წლის ასაკში ბუნებრივი სიკვდილით გარდაიცვალა.
