რუსთაველის ძეგლთან ბლოკი "ევროპული საქართველო თავისუფალი დემოკრატების" ორგანიზებით პირველი რესპუბლიკისადმი მიძღვნილი ფოტო გამოფენა გაიმართა. გამოფენა მიმოიხილავს ისეთ თემებს როგორიცაა, დამოუკიდებლობის გამოცხადება, რესპუბლიკის საერთაშორისო აღიარება, საზოგადოებრივ-პოლიტიკური ცხოვრება და არჩევნები.
"დამოუკიდებლობის დღე არის მთავარი დღესასწაული ჩვენი ქვეყნისთვის, ჩემთვის პირადად ეს არის ყველაზე ბედნიერი დღე და მინდა თითოეულ ჩვენს თანამოქალაქეს მივულოცო. ეს შეხსენებაა ჩვენი თავისუფლების, ჩვენი თავისუფლებისთვის ბრძოლის. მე ასევე მიხარია, რომ ჩვენ შარშან დავამკვიდრეთ ტრადიცია. ჩვენთან ასე არსებობს, რომ ხელისუფლებაში მყოფი ძალა ზეიმობს და ყველა სხვა დანარჩენი არ უყურებს, ან მონაწილეობს. არადა, ეს არის ერთობლივი ზეიმი იმიტომ, რომ დამოუკიდებლობისთვის ბრძოლა იყო, არის და რჩება ზეპარტიულ ამოცანად. ჩვენ შარშან ეს ტრადიცია დავამკვიდრეთ და 1918-1921 წლის გამოფენას ჩვენი ძალებით ვრთავთ ხოლმე სადღესასწაულო ღონისძიებებში და მე მიხარია, რომ ძალიან ბევრი ადამიანი მოდის და აკვირდება, კითხულობს, აინტერესებს. რაც მთავარია, დღეს მე როგორც ვნახე, ეს კონტექსტი მთლიანად გამქრალია ოფიციალური სადღესასწაულო ღონისძიებებიდან, რაც მიმაჩნია, რომ არასწორია და შესაბამისად ჩვენ როგორც ოპოზიციური ძალა ამჯერად უკვე თავისუფალ დემოკრატებთან ერთად ვცდილობთ და ვაპირებთ ეს ტრადიცია შევინარჩუნოთ. 26 მაისს უნდა შევქმნათ პრეცედენტი, რომ ჩვენ ერთობლივად ვზეიმობთ არა ცერემონიალურ ღონისძიებებში, არამედ ის, რაც მოგვწონს, რაც გვიხარია და რაც მნიშვნელოვანია, როდესაც ვსაუბრობთ 26 მაისზე." თქვა "ევროპული საქართველოს" ლიდერმა გიგი უგულავამ.