"მემეგობრე შენც"- ქუთაისის ახალგაზრდულმა ცენტრმა თბილისის სამხატვრო აკადემიის მხარდაჭერით გამოფენა გამართა.
გამოფენის მთავარი თემა სასკოლო ბულინგია.
ქუთაისის ახალგაზრდული ცენტრის სამხატვრო სკოლა შეეცადა პრობლემა მოსწავლის პერსპექტივაში წარმოეჩინა, 3 თვიანი მუშაობის მანძილზე შეიქმნა 55 სურათი, რომელიც თითოეული მოსწავლის გამოცდილებას გვიყვება.
"ბოლო პერიოდში საზოგადოებაში მომეტებული აგრესიული ფონი სულ უფრო მეტად გვარწმუნებს, რომ მეტი დრო დავუთმოთ მოზარდთა პრობლემას, ერთ-ერთი მნიშვნელოვანი გამოწვევა სასკოლო ბულინგის დამარცხებაა",- ამბობენ გამოფენის ორგანიზატორები.
ბულინგზე შექმნილი ნამუშევრების გარდა სტუმრებს წლის განმავლობაში მოსწავლეების მიერ შექმნილ სურათებს შეუძლიათ გაეცნონ.