მოძრაობა "მე ვიცავ თავისუფლებას“ აქციებს რეგიონებშიც გამართავს. მოქმედების გეგმა რუსთაველის თეატრთან შეკრებილ აქტივისტებს კოკა გუნცაძემ გააცნო.
მისი თქმით, 11 ნოემბერს თელავში ჩატარდება "მრავალრიცხოვანი აქცია". 16 ნოემბერს გაემგზავრებიან ბათუმში, 17 ნოემბერს – ქუთაისსა და სამტრედიაში, 20 ნოემბერს გორში და შემდგომ რუსთავში.
"არჩევნების წინა დღეს კი, 17:00 სთ-ზე ყველანი ვიკრიბებით პირველი რესპუბლიკის მოედანზე, საიდანაც გრანდიოზული მსვლელობა მოეწყობა“, – განაცხადა კოკა გუნცაძემ.
დღეს ქართული ოცნების მხარდამჭერებმა რუსთაველის გამზირზე "სააკაშვილის მმართველობის 9 წელი" და 2007 წლის 7 ნოემბრის მოვლენები გააპროტესტეს. აქცია, სახელწოდებით "მე ვიცავ თავისუფლებას", რუსთაველის თეატრში დაიწყო და შემდეგ, ქუჩაში გაგრძელდა. სიტყვით ქართული ოცნების მხარდამჭერები გამოვიდნენ. მათ მოუწოდეს ყველას, მეორე ტურში მხარი სალომე ზურაბიშვილს დაუჭირონ.
