აშშ-ის კონგრესში საქართველოს მეგობართა ჯგუფის თავმჯდომარე, ტეხასის შტატის რესპუბლიკელი კონგრესმენი ტედ პო აშშ-ის სავაჭრო წარმომადგენელ რობერტ ლაიტჰაიზერს აშშ-სა და საქართველოს შორის თავისუფალი ვაჭრობის შესახებ შეთანხმების გაფორმებისაკენ მოუწოდებს.
"გწერთ, როგორც საქართველოსთან ჩვენი ორმხრივი თანამშრომლობის ძლიერი მხარდამჭერი, რათა განიხილოთ ჩვენს მოკავშირე საქართველოსთან თავისუფალი ვაჭრობის შესახებ შეთანხმების გაფორმების საკითხი" - აღნიშნულია წერილში.
პოს თქმით საქართველო აშშ-ის უმნიშვნელოვანესი სტრატეგიული პარტნიორია, რომელმაც ბოლო ორი ათწლეულის განმავლობაში პოლიტიკური და ეკონომიკური რეფორმების სფეროში შთამბეჭდავ პროგრესს მიაღწია და აშშ-სთან მჭიდრო თანამშრომლობით, საქართველო კავკასიის რეგიონში სტაბილურობის უზრუნველსაყოფად ძირითად როლს ასრულებს.
"ჩვენს ერებს შორის სავაჭრო ბარიერების შემცირება ხელს შეუწყობს ჩვენი პარტნიორობის კიდევ უფრო გაძლიერებას." - აღნიშნავს კონგრესმენი.
შეგახსენებთ, რომ საქართველოსთან თავისუფალი ვაჭრობის შეთანხმებაზე თბილისში ვიზიტისას აშშ-ის ეროვნული უსაფრთხოების მრჩეველმა, ჯონ ბოლტონმაც ისაუბრა:
"ეკონომიკის მხრივ არსებობს შესაძლებლობები საქართველოში აშშ-ის ვაჭრობისა და ინვესტიციების გასაზრდელად. თითქმის ყველა, ვისაც ვესაუბრე ლაპარაკობდა საქართველოს სურვილზე ჰქონდეს თავისუფალი ვაჭრობის შეთანხმება აშშ-სთან და ვფიქრობ ეს განხილვის ღირსია." თქვა მან.
მიმდინარე წლის ივნისში, რობერტ ლაიტჰაიზერს აშშ-სა და საქართველოს შორის თავისუფალი ვაჭრობის შესახებ შეთანხმების გაფორმების რეკომენდაციით 28 კონგრესმენმა მიმართა.