შინაგან საქმეთა სამინისტროს განცხადებით, ძლიერი წვიმის და ქარის გამო, გამო გომბორის უღელტეხილზე ავტოტრანსპორტის მოძრაობა დროებით შეზღუდულია. საავტომობილო მოძრაობას შინაგან საქმეთა სამინისტროს საპატრულო დეპარტამენტის თანამშრომლები არეგულირებენ.
კახეთის მიმართულებით მოძრავი ავტომანქანები თბილისი-ბაკურციხე-თელავის საავტომობილო მაგისტრალით ისარგებლებენ. გომბორის უღელტეხილზე ავტომანქანით გადაადგილება ამინდის გაუმჯობესების შემდეგ აღდგება.
ასევე, გარემოს ეროვნული სააგენტოს ინფორმაციით, 20 ივნისამდე აღმოსავლეთ საქართველოში დროგამოშვებით წვიმა-ელჭექით, ზოგან ძლიერი, სეტყვა და ქარის შკვალური გაძლიერებაა მოსალოდნელი.
მათივე ცნობით, მოსალოდნელმა ძლიერმა ნალექებმა შესაძლებელია მდინარეებზე წყლის დონის მატება და ქვეყნის მთიან ზონებში მეწყრულ-ღვარცოფული პროცესების გააქტიურება გამოიწვიოს.