ყოფილი პრემიერმინისტრი ბიძინა ივანიშვილი პოლიტიკაში ბრუნდება. ამის შესახებ განცხადება გიორგი კვირიკაშვილმა რამდენიმე წუთის წინ გააკეთა. კვირიკაშვილის თქმით, მან ბიძინა ივანიშვილს პარტიის თავმჯდომარეობა შესთავაზა, რაზეც ყოფილი პრემიერი დათანხმდა. პარტიის თავმჯდომარის პოსტს აქამდე გიორგი კვირიკაშვილი იკავებდა.
"მას ყველაზე მეტად ძალუძს გააძლიეროს მთავარი პოლიტიკური ბირთვი პარტიის თავმჯდომარის რანგში. შესძინოს მეტი და ახალი დინამიკა შემდგომი განვითარებისთვის, მეტი ეფექტურობისთვის და პროგრესისთვის როგორც აღმასრულებელ, ასევე საკანონმდებლო ხელისუფლებას და თვითმმართველ ორგანოებს." - თქვა კვირიკაშვილმა.
გარდა ამისა, გიორგი კვირიკაშვილმა განაცხადა, რომ უახლოეს დღეებში გაიმართება პარტიის პოლიტსაბჭოს სხდომა და ყრილობა, სადაც ბიძინა ივანიშვილს თავმჯდომარედ აირჩევენ. მისივე ინფორმაციით, არჩეული იქნება პოლიტსაბჭოს ახალი შემადგენლობაც.
"დარწმუნებული ვარ, გადაწყვეტილება პოზიტიურად აისახება ქვეყნის პოლიტიკურ ცხოვრებაზე", - აღნიშნა პრემიერმინისტრმა.
