თბილისის მერიის ინფორმაციით, ზემო ფონიჭალაში ოკუპაციის მსხვერპლთა სახელობის პარკი მოეწყობა. სარეაბილიტაციო სამუშაოები კახა კალაძემ გუშინ დაათვალიერა. თბილისის მერის თქმით, გამოცხადდება კონკურსი ოკუპაციის მსხვერპლთა მემორიალის ესკიზის შექმნაზე.
“მაქვს წინადადება, მშვიდობიანობის დროს ოკუპაციის მსხვერპლთა საპატივცემულოდ ეს პარკი იყოს მათი სახელობის. უნდა გამოვაცხადოთ კონკურსი სახელწოდებასთან და მემორიალთან დაკავშირებითაც. ძალიან ბევრი გმირი გვყავს ჩვენ, ვინც ოკუპაციას შეეწირა ომში, მაგრამ ძალიან დიდი უბედურება და კატასტროფაა ის, რომ მშვიდობიანობის დროს ოკუპაციას ეწირებიან ადამიანები. ჩვენ გუშინ დავკრძალეთ ჩვენი გმირი, არჩილ ტატუნაშვილი, შესაბამისად ამ ადამიანებს სჭირდება დაფასება. ამიტომ, ვთავაზობ ყველას, ვისაც სურვილი აქვს, ამ პროექტის განხორციელებაში ჩაერთოს ჩვენთან ერთად, რომ ამ ადამიანების სახელი იყოს უკვდავყოფილი”, - განაცხადა კახა კალაძემ.
თბილისის მერიის ინფორმაციით, ამ ეტაპზე ფონიჭალაში მდებარე პარკში გამწვანების სამუშაოები მიმდინარეობს.
"დაახლოებით, 8 000 კვ.მ-ზე სრულიად ახალი რეკრეაციული სივრცე მოეწყო. პარკის მშენებლობა კრწანისის გამგეობამ გასულ წელს დაიწყო. დამონტაჟდა განათების ქსელი და სარწყავი სისტემა, მოეწყო ბილიკები და გამწვანების მასშტაბური თარგები, სადაც 15 სახეობის ხე-მცენარე, მათ შორის, ბუჩქოვანი მცენარეებიც დაირგო, გაკეთდა შადრევანი" - აცხადებს დედაქალაქის მთავრობა.
შეგახსენებთ, რომ მას შემდეგ, რაც შეიქმნა პეტიცია მოსკოვის გამზირისთვის არჩილ ტატუნაშვილის სახელის დარქმევის შესახებ, კახა კალაძე გამოვიდა ინიციატივით, ოკუპაციის მსხვერპლთა საპატივსაცემოდ, პარკი გაშენდეს.
