მძიმეა 32 წლის ქალის მდგომარეობა, რომელსაც 11 იანვარს, ყოფილმა ქმარმა 14 ჭრილობა მიაყენა. 2 მცირეწლოვანი შვილის დედა რეანიმაციულ განყოფილებაში კრიტიკულ მდგომარეობაში იმყოფება. ასევე მძიმეა ქალის მეგობარი კაცის მდგომარეობა, რომელსაც ცივი იარაღით მიყენებული ჭრილობები აღენიშნება.
შემთხვევის დროს არასრულწლოვნები ბინაში არ იმყოფებოდნენ.
მკვლელობის მცდელობა თბილისში, სამგორის რაიონში მოხდა. რუსთავი 2-ის ინფორმაციით, ყოფილი მეუღლე ქალზე სისტემატურად ძალადობდა, დახმარების თხოვნით კი, დაზარალებულმა პოლიციას რამდენჯერმე მიმართა.
მომხდართან დაკავშირებით გამოძიება ოჯახში ძალადობის საფუძველზე ორი პირის მკვლელობის მცდელობის ფაქტზე მიმდინარეობს. დაკავებული ბრალს აღიარებს.
