თბილისის არჩეული მერის, კახა კალაძის დავალების შემდეგ, თბილსერვის ჯგუფმა გმირთა მოედნის მიწისქვეშა გადასასვლელში მორეცხვითი სამუშაოები დაიწყო.
"პარალელურად, დაიწყო და მიმდინარეობს განათების ქსელის მოწყობა გმირთა მოედნის მიწისქვეშა გადასასვლელის იმ ნაწილში, სადაც მორეცხვითი სამუშაოები ამ დროისთვის უკვე დასრულებულია" - აცხადებს თბილსერვის ჯგუფი და აღნიშნავს, რომ განათების სისტემის მონტაჟი ორი დღის განმავლობაში დასრულდება.
თბილისის არჩეულმა მერმა კახა კალაძემ მიწისქვეშა გადასასვლელები დღეს მოინახულა და მდგომარეობით უკმაყოფილო დარჩა. მისი შეფასებით, არსებული ვითარება "ვერ უძლებს კრიტიკას". კალაძის თქმით, მიწისქვეშა გადასასვლელში სუნის გამო პირბადის გარეშე გადაადგილება შეუძლებელია. მან "თბილსერვისის" ხელმძღვანელს მიმართა, რომ დღესვე დაიწყოს გადასასვლელებში ისეთი სამუშაოების შესრულება, როგორიცაა მორეცხვა, ელექტრო გაყვანილობა და განათება.