ამერიკული ყვითელი პრესის ცნობით, მომღერალი ჯასტინ ბიბერი შემთხვევით მანქანით პაპარაცის დაეჯახა. ინციდენტი დღეს ბევერლი ჰილსში მოხდა, ლოს ანჯელესის დროით საღამოს 10-ის ნახევარზე, როცა ბიბერი ეკლესიიდან გამოდიოდა.
"ჯასტინი მძღოლის სავარძელზე იჯდა, როცა ფოტოკამერების განათება შეამჩნია. მან ნელნელა დაძრა მანქანა. მანქანის სავალ ნაწილზეც და ქვეითებისთვის განკუთვნილ ადგილზეც ფოტოგრაფების ჯგუფები იყვნენ მობილიზებული. როდესაც მან მანქანა დაძრა, ავტომობილის სავალ ნაწილზე მდგარი პაპარაცი მის მანქანას წინიდან უვლიდა გვერდს. უკონტროლო სიტუაცია იყო, თვალებში კამერების ფლეშები ანათებდა,"- ყვება თვითმხილველი.
მისი თქმით, ჯასტინ ბიბერი იმდენად ვერ ხედავდა, რას აკეთებდა, როდესაც ფოტოგრაფებმა კამერები გათიშეს და მეგობარს დაეხმარნენ, მხოლოდ მაშინღა გაანალიზა, რა მოხდა, რის შემდეგადაც, ის მანქანიდან დასახმარებლად გადმოვიდა.
სხვა თვითმხილველი კი ამბობს, რომ ბიბერი საკმაოდ განერვიულებული იყო და როდესაც პოლიცია მოვიდა, მათთან აქტიურად თანამშრომლობდა.
ამერიკული პრესის ცნობით, ჯასტინ ბიბერი არ დააკავეს და მხოლოდ გამოკითხვაზე იმყოფებოდა. 57 წლის პაპარაცი კი ლოს ანჯელესის ცენტრალურ კლინიკაში გადაიყვანეს და მას ჯანმრთელობისათვის საშიში დაზიანებები არ აღმოუჩნდა.