საბანკო საიდუმლოება

საკონსტიტუციომ საბანკო საიდუმლოების შემზღუდავი ნორმა არაკონსტიტუციურად ცნო

AP Photo

საქართველოს საკონსტიტუციო სასამართლომ დააკმაყოფილა ლევან ალაფიშვილის კონსტიტუციური სარჩელი, რომელიც საბანკო საიდუმლოების შემზღუდავ საკანონმდებლო ნორმებს ეხებოდა. გადაწყვეტილების მიხედვით, ძალადაკარგულად გამოცხადდა ადმინისტრაციულ საპროცესო კოდექსში 2014 შესული ცვლილებები, რომლითაც საგადასახადო ორგანოს პერსონალურ საბანკო საიდუმლოებაზე მიეცა წვდომა.

სასამართლომ საქართველოს კონსტიტუციის 42-ე მუხლის პირველი და მესამე პუნქტებთან მიმართებით არაკონსტიტუციურად ცნო:

1. საქართველოს ადმინისტრაციული საპროცესო კოდექსის 2150 მუხლის მე-2 პუნქტის სიტყვების "იმ პირის მონაწილეობის გარეშე, რომლის შესახებ კონფიდენციალური ინფორმაციის მიღებასაც ითხოვს საგადასახადო ორგანო საქართველოს საერთაშორისო ხელშეკრულების საფუძველზე" ის ნორმატიული შინაარსი, რომელიც:

ა.ა) მოსამართლეს ართმევს შესაძლებლობას, ინდივიდუალური გარემოებების შესწავლის საფუძველზე გადაწყვიტოს შუამდგომლობის განხილვაში იმ პირის მონაწილეობის საკითხი, რომლის შესახებ კონფიდენციალური ინფორმაციის მიღებას ითხოვს საგადასახადო ორგანო საქართველოს საერთაშორისო ხელშეკრულების საფუძველზე; 
ა.ბ) პირის სამართალწარმოებიდან გამორიცხვის შემთხვევაში არ ითვალისწინებს მისთვის შეტყობინების ვალდებულებას მას შემდეგ, რაც გაქარწყლდება შეტყობინებასთან დაკავშირებული საფრთხეები.

2. ამავე კოდექსის 2150 მუხლის მე-7 პუნქტის სიტყვების: "საგადასახადო ორგანოს უფლება აქვს, მოსამართლის ბრძანების გაუქმების თაობაზე საჩივარი შეიტანოს ბრძანების გამომცემ სასამართლოში მისთვის ბრძანების ეგზემპლარის გადაცემიდან 48 საათში" ის ნორმატიული შინაარსი, რომელიც გამორიცხავს პირის, რომლის შესახებ კონფიდენციალური ინფორმაციის მიღებასაც ითხოვს საგადასახადო ორგანო საქართველოს საერთაშორისო ხელშეკრულების საფუძველზე, შესაძლებლობას, შეიტანოს საჩივარი მოსამართლის ბრძანების გაუქმების თაობაზე.

გადაწყვეტილება მიიღო საკონსტიტუციო სასამართლოს პირველმა კოლეგიამ.

კომენტარები