გერმანული ავტოგიგანტი Volkswagen AG 2016 წელს მსოფლიოს უმსხვილესი ავტომწარმოებელი გახდა. მან ეს ტიტული იაპონურ Toyota Motor Corp-ს წაართვა.
Volkswagen-ის გაყიდვების ოფიციალური მონაცემებით, კომპანიამ 10.3 მილიონი ავტომობილი გაყიდა, რაც 2015 წელთან შედარებით 3.8%-ით მეტია. Toyota-ს გაყიდვები კი მხოლოდ 0.2%-ით გაიზარდა და 10.2 მილიონი ავტომობილი შეადგინა.
Volkswagen-ის ასეთი მაღალი ზრდის მიზეზი ჩინურ ბაზარზე არსებულ ზრდას უკავშირდება, ჩინეთის ბაზარზე Volkswagen-ის გაყიდვები 12%-ით გაიზარდა.
მესამე ადგილზე, გაყიდული 9.5 მილიონი ავტომობილით, General Motors-ია.
ტრამპის რისკები:
17 იანვარს დონალდ ტრამპი გერმანელ ავტომწარმოებლებს 35%-იანი ტარიფებით დაემუქრა.
"თუ გინდათ, რომ მსოფლიოს გარშემო აწარმოებდეთ ავტომობილებს, მე ამაში წარმატებებს გისურვებთ. შეგიძლიათ ააწყოთ მანქანები აშშ-ისთვის, მაგრამ ყოველი ავტომობილისთვის, რომელიც აშშ-ის მიწაზე შემოვა, თქვენ 35%-იანი ტარიფის გადახდა მოგიწევთ", - ამბობდა ტრამპი.
ტრამპი Toyota-სთვისაც მნიშვნელოვან რისკს წარმოადგენს, რადგანაც კომპანია აშშ-ის ბაზრისთვის განკუთვნილი ავტომობილების, განსაკუთრებით კი, თავისი ბესტსელერის - Corolla-ს წარმოების დაწყებას მექსიკაში გეგმავდა. ტრამპის არჩევის შემდეგ კი განაცხადა, რომ მომდევნო 10 წლის განმავლობაში აშშ-ში ქარხნების მშენებლობაზე $10 მილიარდს დახარჯავს.