არჩევნების დღეს ჯიხაშკარში მომხდარ ინციდენტთან დაკავშირებით სამართალდამცველებმა კიდევ ერთი პირი დააკავეს, რომელმაც, სავარაუდოდ, უცხოელ დამკვირვებელს ფიზიკური შეურაცხყოფა მიაყენა, - ამის შესახებ შინაგან საქმეთა მინისტრის მოადგილემ შალვა ხუციშვილმა განაცხადა.
"ჯიხაშკარის ინციდენტთან დაკავშირებით პოლიციამ გუშინ კიდევ ერთი პირი დააკავა, რომელიც, სავარაუდოდ, მონაწილეობდა უცხოელი დამკვირვებლისთვის შეურაცხყოფის მიყენებაში. ჯერჯერობით მის მიმართ სხვა საპროცესო ღონისძიება არ განხორციელებულა. დაზარალებულმა მისი ამოცნობა მოახერხა ახლა, რადგან ის ფიზიკურად სქართველოში არ იმყოფებოდა", - თქვა ხუციშვილმა და აღნიშნა, რომ გორში 30 ოქტომბერს მომხდარ საარჩევნო ინციდენტთან დაკავშირებით, "მიმდინარეობს გამოძიება და დაახლოებით 7 პირია გამოკითხული".
ჯიხაშკარში უბნების დარბევისთვის 2 პირი 12 ოქტომბერს დააკავეს. აღსანიშნავია, რომ ჯიხაშკარის 108-ე და 79-ე უბანზე განმეორებითი არჩევნები ჩატარდა.
