ხვალ, 11:00 საათზე, საქართველოს ნარკოპოლიტიკის ეროვნული პლატფორმის დაფუძნებასთან დაკავშირებით Rooms Hotel Tbilisi-ში პრესკონფერენცია გაიმართება. როგორც პრესრელიზშია ნათქვამი, პლატფორმა ხელს შეუწყობს სამოქალაქო საზოგადოების, სათემო ჯგუფების და ექსპერტების ჩართულობას ნარკოტიკებთან დაკავშირებული პოლიტიკის ფორმირებაში და ადვოკატირებას გაუწევს ეფექტური და ჰუმანური პოლიტიკის ჩამოყალიბებას.
საქართველოს ნარკოპოლიტიკის ეროვნული პლატფორმა არის თანასწორუფლებიანობის პრინციპზე დაფუძნებული გაერთიანება, რომლის მიზანია საქართველოში არაეფექტური სადამსჯელო ნარკოპოლიტიკის ცვლილება და იმ ზიანის შემცირება, რომელიც საზოგადოებას ადგება ნარკოტიკების მოხმარების და მოქმედი ნარკოპოლიტიკის შედეგად. ნარკოპოლიტიკის ეროვნული პლატფორმა აერთიანებს დაინტერესებულ მხარეებს და ჯგუფებს, სამოქალაქო საზოგადოებას და სათემო ორგანიზაციებს, სერვისების მიმწოდებლებს, კლინიცისტებს, აკადემიური დარგის წარმომადგენლებს, რომლებიც მუშაობებ ნარკოპოლიტიკის სფეროში.
საქართველოს ნარკოპოლიტიკის ეროვნული პლატფორმის საქმიანობის ძირითადი მიმართულებებია: ნარკოტიკებთან დაკავშირებული კანონმდებლობის რეფორმა, ნარკოტიკების მომხმარებლებისათვის ხარისხიან სერვისებზე ხელმისაწვდომობის უზრუნველყოფა, საზოგადოების ინფორმირებულობის დონის ამაღლება ნარკოტიკების მოხმარების საკითხებზე ნარკოტიკების მომხმარებლების მიმართ სტიგმა/დისკრიმინაციის შესამცირებლად", - წერია პრესრელიზში.
