პრემიერმინისტრი 2014 წელს დაწესებული სავიზო რეგულაციების გამარტივებას პოზიტიურ ნაბიჯს უწოდებს. დღევანდელ სხდომაზე ირაკლი ღარიბაშვილმა ახალი რეგულაციები განმარტა და აღნიშნა, რომ "ეს გამარტივებები მნიშვნელოვნად შეუწყობს ხელს ტურიზმის შემოდინებას".
"მოგეხსენებათ, რომ ჩვენ უკვე გადავწყვიტეთ, უცხოელი მოქალაქეებისთვის მოიხსნას აქამდე არსებული მთელი რიგი შეზღუდვები. ჩვენ ეს ცვლილებები შემოგვაქვს დეტალური ანალიზის საფუძველზე. ჩვენ იმ ქვეყნებთან, ვისაც უკვე ჰქონდა უვიზო მიმოსვლა, გავაუქმეთ 90-დღიანი ლიმიტი და ამ ქვეყნებთან დავადგინეთ ერთწლიანი ლიმიტი. ეს არის ძალიან მნიშვნელოვანი, რომ მათ შეეძლოთ თავისუფლად დარჩენა საქართველოში, ერთი წლის განმავლობაში. ასევე ჩვენ დავამტკიცეთ იმ ქვეყნების ჩამონათვალი, რომელთა ვიზების ან ბინადრობის ნებართვის მქონე მოქალაქეებს შეუძლიათ საქართველოში უვიზოდ შემოსვლა 90 დღის ვადით, ნებისმიერი 180 დღის პერიოდში. ამ ნუსხაში შედიან მიგრაციისა და უსაფრთხოების პოლიტიკის მაღალი ხარისხით გამორჩეული ქვეყნები, კერძოდ, ევროკავშირსა და შენგენის ზონაში შემავალი ქვეყნები, ასევე ავსტრალია, ამერიკა, ახალი ზელანდია, დიდი ბრიტანეთი, იაპონია, ისრაელი, კანადა და სამხრეთ კორეა. ასევე ე.წ. მესამე ქვეყნების მქონე მოქალაქეებიც, რომლებსაც აქვთ შენგენის, ევროკავშირის, ან მთავრობის დადგენილებით დამტკიცებული 50 ქვეყნიდან ერთ-ერთი ქვეყნის ვიზა, ან ბინადრობა მაინც, საქართველოში ვიზის გარეშე შემოვლენ ისინიც. ვფიქრობ, რომ ეს გამარტივებები ძალიან მნიშვნელოვანდ შეუწყობს ხელს ტურიზმის შემოდინებას და მიმაჩნია, რომ ეს არის ძალიან პოზიტიური ნაბიჯი", - განაცხადა ღარიბაშვილმა.
შეგახსენებთ, რომ საქართველოს მთავრობამ ახალი დადგენილებით დაამტკიცა იმ ქვეყნების ჩამონათვალი, რომელთა მოქალაქეებსაც შეუძლიათ საქართველოში უვიზოდ შემოსვლა. სია 94 ქვეყანას მოიცავს. მათ საქართველოში უვიზოდ შემოსვლისა და სრული 1 წლის ვადით ყოფნის უფლება აქვთ. ჩამონათვალში ვერ მოხვდნენ ირანი, ერაყი, ჩინეთი, პერუ, ჩილე, ბოლივია, გვატემალა.
საქართველოში უვიზოდ შემოსვლის უფლება აქვთ: ავსტრალიის თანამეგობრობა, ავსტრიის რესპუბლიკა, აზერბაიჯანის რესპუბლიკა, ალბანეთის რესპუბლიკა, ამერიკის შეერთებული შტატები, ანდორის სამთავრო, ანტიგუა და ბარბუდა, არაბთა გაერთიანებული საამიროები, არგენტინის რესპუბლიკა, ახალი ზელანდია, ბარბადოსი, ბაჰრეინის სამეფო, ბაჰამის თანამეგობრობა, ბელარუსის რესპუბლიკა, ბელგიის სამეფო, ბელიზი, ბოსნია და ჰერცეგოვინა, ბოტსვანის რესპუბლიკა, ბრაზილიის ფედერაციული რესპუბლიკა, ბრუნეი-დარუსალამი, ბულგარეთის რესპუბლიკა, გერმანიის ფედერაციული რესპუბლიკა, დანიის სამეფო, დანიის სამეფოს ტერიტორიები – ფარერის კუნძულები და გრენლანდია, დიდი ბრიტანეთისა და ჩრდილოეთ ირლანდიის გაერთიანებული სამეფო, დიდი ბრიტანეთისა და ჩრდილოეთ ირლანდიის გაერთიანებული სამეფოს საზღვარგარეთის ტერიტორიები – ბერმუდის კუნძულები, კაიმანის კუნძულები, ბრიტანეთის ვირჯინის კუნძულები, ფოლკლენდის კუნძულები, ტერკსის და კაიკოსის კუნძულები, გიბრალტარი, დიდი ბრიტანეთისა და ჩრდილოეთ ირლანდიის გაერთიანებული სამეფოს დამოკიდებული ტერიტორიები – ჯერზი, გერნზი, კუნძული მენი, დომინიკის რესპუბლიკა, ელ-სალვადორი, ეკვადორის რესპუბლიკა, ესპანეთის სამეფო, ესტონეთის რესპუბლიკა, თურქეთის რესპუბლიკა, თურქმენეთი, იაპონია, ირლანდიის რესპუბლიკა,
ისლანდია, ისრაელის სახელმწიფო, იტალიის რესპუბლიკა, კანადა, კატარის სახელმწიფო, კვიპროსის რესპუბლიკა, კოლუმბიის რესპუბლიკა,
კორეის რესპუბლიკა, კოსტა-რიკის რესპუბლიკა, ლატვიის რესპუბლიკა, ლიტვის რესპუბლიკა, ლიბანის რესპუბლიკა, ლიხტენშტაინის სამთავრო,
ლუქსემბურგის დიდი საჰერცოგო, მავრიკის რესპუბლიკა, მალაიზია, მალტის რესპუბლიკა, მექსიკის შეერთებული შტატები, მონაკოს სამთავრო,
მოლდოვის რესპუბლიკა, მონტენეგრო, ნიდერლანდების სამეფო, ნიდერლანდის სამეფოს ტერიტორიები – არუბის და ნიდერლანდის ანტილის კუნძულები, ნორვეგიის სამეფო, ომანის სასულთნო, პანამის რესპუბლიკა, პოლონეთის რესპუბლიკა, პორტუგალიის რესპუბლიკა, რუმინეთი,
რუსეთის ფედერაცია, საბერძნეთის რესპუბლიკა, სამხრეთ აფრიკის რესპუბლიკა, სან-მარინოს რესპუბლიკა, საუდის არაბეთის სამეფო, საფრანგეთის რესპუბლიკა, საფრანგეთის რესპუბლიკის ტერიტორიები – საფრანგეთის პოლინეზია და ახალი კალედონია, სეიშელის კუნძულები, სენტ-ვისენტი და გრენადინები, სერბეთის რესპუბლიკა, სინგაპურის რესპუბლიკა, სლოვაკეთის რესპუბლიკა, სლოვენიის რესპუბლიკა, სომხეთის რესპუბლიკა, ტაილანდის სამეფო, ტაჯიკეთის რესპუბლიკა, უზბეკეთის რესპუბლიკა, უკრაინა, უნგრეთი, ფინეთის რესპუბლიკა, ქუვეითის სახელმწიფო, ყირგიზეთის რესპუბლიკა, ყაზახეთის რესპუბლიკა, შვედეთის სამეფო, შვეიცარიის კონფედერაცია, ჩეხეთის რესპუბლიკა, წმინდა საყდარი, ხორვატიის რესპუბლიკა და ჰონდურასის რესპუბლიკა.
საქართველოს მთავრობამ ახალი დადგენილებით გააუქმა 2014 წლის 1 სექტემბრის დადგენილება "იმ ქვეყნების ჩამონათვალის დამტკიცების შესახებ, რომელთა მოქალაქეებსაც შეუძლიათ საქართველოში უვიზოდ შემოსვლა". ამ დოკუმენტით სხვადასხვა ქვეყნის მოქალაქეებს საქართველოში უვიზოდ შემოსვლა ეზღუდებოდათ. მათ 180 დღის განმავლობაში მხოლოდ 90 დღით ჰქონდათ ქვეყანაში დარჩენის უფლება.
