აშშ-ის თავდაცვის მდივანი ჩაკ ჰეიგელი უკვე საქართველოშია. თავდაცვის სამინისტროს ინფორმაციით, პენტაგონის ხელმძღვანელს თბილისის საერთაშორისო აეროპორტში მინისტრის მოადგილე მიხეილ დარჩიაშვილი დახვდა. აეროპორტში იმყოფებოდნენ ასევე, აშშ-ის ელჩი საქართველოში რიჩარდ ნორლანდი, მისი ქართველი კოლეგა არჩილ გეგეშიძე და აშშ-ის თავდაცვის ატაშე საქართველოში, პოლკოვნიკი მეთიუ დიმიკი.
აშშ-ის თავდაცვის მდივანი საქართველოს პირველი ოფიციალური ვიზიტით ეწვია. ხვალ, საქართველოს თავდაცვის მინისტრი ირაკლი ალასანია ამერიკელ კოლეგას თავდაცვის სამინისტროში მიიღებს.
დაგეგმილია შეხვედრები საქართველოს პრემიერ-მინისტრთან ირაკლი ღარიბაშვილთან და საქართველოს პრეზიდენტთან გიორგი მარგველაშვილთან.
სამინისტროს ინფორმაციით, პენტაგონის უმაღლესი წარმომადგენელი გმირთა მოედანზე საქართველოს ერთიანობისათვის დაღუპულ გმირთა მემორიალს გვირგვინით შეამკობს. ოფიციალური ვიზიტის ფარგლებში, აშშ-ის თავდაცვის მდივანი ეროვნულ სასწავლო ცენტრ "კრწანისში" ქართველ სამხედრო მოსამსახურეებსა და ამერიკელ საზღვაო ქვეითებს შეხვდება და სიტყვით მიმართავს.
ამერიკის შეერთებული შტატების თავდაცვის მდივნის ორდღიანი ოფიციალური ვიზიტი საქართველოში 8 სექტემბერს დასრულდება.
