საქართველოში ერთიანი ეროვნული გამოცდები დაიწყო. როგორც შეფასებისა და გამოცდების ეროვნული ცენტრის დირექტორმა მაია მიმინოშვილმა ჟურნალისტებთან საუბრისას განაცხადა, საგამოცდო პროცესი დილის 08:00 საათზე დაიწყო და რეგისტრაცია ერთი საათის განმავლობაში მიმდინარეობდა. საგამოცდო დროის ათვლა კი, ყველა საგამოცდო ცენტრში ზუსტად 09:00 საათზე დაიწყო.
მაია მიმინოშვილი აღნიშნავს, რომ აბიტურიენტები დღეს ქართული ენისა და ლიტერატურის სავალდებულო გამოცდას აბარებენ. გამოცდა ოთხ ნაკადად ჩატარდება. დღეს აბიტურიენტების მიღება ორ ნაკადად მოხდება, საგამოცდო ცენტრში 17 000-ზე მეტი აბიტურიენტი უნდა გამოცხადდეს. მისივე ინფორმაციით, მთელი საქართველოს მასშტაბით, 19 საგამოცდო ცენტრი ფუნქციონირებს, მათ შორის, 7 თბილისში.
ერთიანი ეროვნული გამოცდებისათვის დარეგისტრირებულია 36 000-მდე აბიტურიენტი, პედაგოგთა სასეტირფიკაციო გამოცდისათვის 20 000-მდე აპლიკანტი, სტუდენტთა საგრანტო კონკურისათვის 4 500-მდე სტუდენტი, ხოლო საერთო სამაგისტრო გამოცდისთვის - 12 000-მდე აპლიკანტმა გაიარა რეგისტრაცია.
