შეთანხმებას ევროკავშირსა და უკრაინას შორის ასოცირების შესახებ ხელი 17 ან 21 მარტს მოეწერება. ამის შესახებ უკრაინის საგარეო საქმეთა მინისტრმა ანდრი დეშჩინამ განაცხადა.
მისი თქმით, ამჟამად თარიღის დაზუსტების მიზნით კონსულტაციები მიმდინარეობს.
8 მარტს ევროკომისიის პრეზიდენტმა ჟოზე მანუელ ბაროზომ განაცხადა, რომ ევროკავშირმა უკრაინასთან ასოცირების ხელშეკრულების პოლიტიკური ნაწილის დაუყოვნებლივ ხელმოწერა გადაწყვიტა.
6 მარტს ბრიუსელში მიიღეს გადაწყვეტილება უკრაინასთან ასოცირების შეთანხმების პოლიტიკურ და ეკონომიკურ ნაწილად გაყოფის შესახებ. ეკონომიკურ ნაწილს ხელი მოგვიანებით მოეწერება, თუმცა მანამდე ევროკავშირი უკრაინას სავაჭრო შეღავათებს მიანიჭებს.
