ამერიკის შეერთებული შტატების სახელმწიფო დეპარტამენტის 2013 წლის ანგარიში საქართველოში მუსლიმთა დისკრიმინაციას ვრცლად მიმოიხილავს. ანგარიშში აღნიშნულია, რომ წინა წლის განმავლობაში ადგილი ჰქონდა მუსლიმთა დისკრიმინაციის რამდენიმე შემთხვევას, რაზეც სახალხო დამცველმა და სამოქალაქო საზოგადოებამ შეშფოთება გამოხატეს.
სახელმწიფო დეპარტამენტი იხსენებს სამთაწყაროს შემთხვევას, სადაც საქართველოს მართლმადიდებელი ეკლესიის წევრები პარასკევის ტრადიციული ლოცვის აღსრულებას ეწინააღმდეგებოდნენ სოფლის ახალ მეჩეთში.
ანგარიშში აღნიშნულია, რომ ქალაქის ხელისუფლება ამტკიცებდა, რომ სოფლის მოსახლეობის უმრავლესობას არ სურდა მეჩეთის აშენება სოფელში. სახელმწიფო დეპარტამენტი აღნიშნავს, რომ სახალხო დამცველი მოითხოვდა აღნიშნული ინციდენტის გამოძიებას. წლის ბოლოს კახეთის პოლიციამ აღნიშნულთან დაკავშირებით გამოძიება დაიწყო.
ანგარიშში ვრცლად არის მიმოხილული სოფელ ჭელაში განვითარებული მოვლენები, როცა ფინანსთა სამინისტროს ანალიტიკურმა ორგანომ სოფელში პოლიციის ოფიცრები გაგზავნა იმისთვის, რომ მეჩეთიდან მინარეთი მოეხსნათ. სახელმწიფო დეპარტამენტის ცნობით, ადგილობრივმა მუსლიმებმა ეს მეჩეთზე თავდასხმად აღიქვეს.
ანგარიშში მოთხრობილია, რომ პოლიციამ 9 ადამიანი დააკავა, რომლებიც მინარეთის მოხსნას ეწინააღმდეგებოდნენ, რის შემდეგაც ექვსს 400-ლარიანი ჯარიმა დაეკისრა და წლის ბოლოს სისხლის სამართლის საქმე პოლიციასთან წინააღმდეგობის გაწევის გამო აღიძრა.
ანგარიშში აღნიშნულია, რომ მიუხედავად სახელმწიფოს დაპირებისა, რომ მინარეთი მეჩეთზე დაბრუნდებოდა, საქართველოს მართლმადიდებელი ეკლესიის ჩარევის შემდეგ ის მინდორზე ინახებოდა. სმე-სა და სახელმწიფოს შორის საკითხის განხილვის შემდეგ, ორი მაღალიერარქი გაემართა ახალციხეში, სადაც მოლაპარაკება გამართა ადგილობრივ მრევლთან და მოუწოდა მათ მინარეთი სოფლისკენ გაეტარებინათ. სახელმწიფო დეპარტამენტი აღნიშნავს, რომ აღნიშნულმა სასულიერო პირებმა განუცხადეს მომიტინგეებს, რომ "მინარეთი ხელახლა არ აღიმართებოდა". ამ დაპირების შემდეგ მინარეთი ჭელაში დაბრუნდა, თუმცა არ აღმართულა.
სამი თვის შემდეგ მინარეთი აღიმართა, თუმცა ანგარიშში მოხსენებულია, რომ ევროსაბჭოს ადამიანის უფლებათა კომისარმა, თომას ჰამარბერგმა ადგილობრივი ხელისუფლების რეაქციებს ამ და სხვა მსგავს სიტუაციებში უწოდა "არასაკმარისი" და განაცხადა, რომ შესაძლოა, არასათანადო რეაქცია ახალი დისკრიმინაციის გამომწვევი გახდეს.
"აგრესორებისა და ხელისუფლების წარმომადგენლების თანამშრომლობის აღქმამ, მათ შორის, სახელისუფლებო ზეგავლენის ნაკლებად გამოყენებამ, ხელი შეუწყო მსგავსი მოვლენების განმეორებას სხვა სოფლებში".
სახელმწიფო დეპარტამენტის ანგარიშში საუბარია სამთავრობო გუნდის რამდენიმე წევრის მხრიდან გაკეთებულ ქსენოფობიურ, რასისტულ და ანტიმუსლიმურ განცხადებებზე.
"მედიის განვითარების ფონდი - მედიის მონიტორინგით დაკავებული არასამთავრობო ორგანიზაცია იტყობინება, რომ ოცნების კოალიციის წევრმა გიორგი გაჩეჩილაძემ, მაისში ერთ-ერთ თოქშოუში დისკრიმინაციული განცხადებები გააკეთა უცხო ქვეყნის მოქალაქეების შესახებ", - აღნიშნულია ანგარიშში.
