მუხროვანის ამბოხი

სიხარულიძე: დარწმუნებული ვარ, რომ ეს იყო ამბოხი

politico.ge

დარწმუნებული ვარ, რომ ეს იყო ამბოხი. ამის შესახებ მუხროვანის ამბოხის დროს მაშინდელმა თავდაცვის მინისტრმა დავით სიხარულიძემ რუსთავი 2-ის ეთერში განაცხადა. მისი თქმით, არებობდა რისკი, რომ არეულობის გადმოდინება სამხედრო ნაწილის გარეთ მომხდარიყო. თუმცა როგორც სიხარულიძე ამბობს, შს მინისტრისგან ამბოხებულების ლიკვიდაციის ბრძანება არ ახსოვს.

"ამბოხება გაცილებით უფრო ადრე დაიწყო, ვიდრე საინფორმაციო საშუალებებმა გამოაცხადეს ამის შესახებ და მაგ პერიოდში ვიყავი უკვე მეოთხე ბრიგადის შტაბში. მე არ შემიშვეს, მე მინისტრი ვიყავი. სამოქალაქო ტანისამოსში გამოწყობილი ადამიანები იყვნენ, რომლებსაც ნიღბები ჰქონდათ. ასევე არ შეუშვეს თავდაცვის სამინისტროს და გენერალური შტაბის სხვა მაღალჩინოსანი პირები და სწორედ ეს იყო დასაწყისი, როცა მივხვდით, რომ ეს იყო აბოხი", - განაცხადა სიხარულიძემ. მისივე თქმით, კონკრეტულ ვიდეოკადრებთან დაკავშირებით ის კომენტარს მანამ არ გააკეთებს, სანამ ამ კადრების ავთენტურობა არ დადასტურდება. 

ცნობისთვის, გუშინ Youtube-ზე 2009 წელს მუხროვანში ამბოხის დროს გადაღებული ვიდეომასალა გავრცელდა. ვიდეომასალის ავთენტურობა ჯერჯერობით დადასტურებული არ არის. მის განმთავსებელს სხვა ვიდეო საკუთარ ანგარიშზე ატვირთული არ აქვს.

შეგახსენებთ, 2009 წლის 5 მაისს თავდაცვის მაშინდელმა მინისტრმა დავით სიხარულიძემ განაცხადა, რომ მუხროვანში განთავსებულმა სატანკო ბატალიონმა ამბოხება მოაწყო. მანამდე, საქართველოს შინაგან საქმეთა სამინისტრომ განაცხადა, რომ ჩაშალა "სრულმასშტაბიანი სამხედრო ამბოხების გეგმა, რომელიც კოორდინირებული იყო რუსეთთან" და რომლის ორგანიზატორებიც ყოფილი სამხედრო მაღალჩინოსნები იყვნენ. ამასთან, გაავრცელა ფარული ვიდეოჩანაწერი თუ როგორ იგეგმებოდა მუხროვანის ამბოხი.

ოფიციალური ინფორმაციით, მუხროვანის ინციდენტის შემდეგ, სამხედრო ამბოხების ორგანიზებაში ბრალდებულებმა - გია კრიალაშვილმა, კობა ოთანაძემ და ლევან ამირიძემ ალყაშემორტყმული მუხროვანის სამხედრო ნაწილიდან გაპარვა მოახერხეს და მათ პოლიცია 16 დღის განმავლობაში ეძებდა. სამინისტრომ 50 000 ლარის ოდენობის ჯილდო დააწესა ძებნილების ადგილსამყოფელის შესახებ ინფორმაციის სანაცვლოდ. თუმცა, მოგვიანებით ოთანაძის ადგილსამყოფელის შესახებ ინფორმაციისთვის თანხა 200 000 ლარამდე გაიზარდა.

2009 წლის 21 მაისს კი, შინაგან საქმეთა სამინისტრომ გაავრცელა ინფორმაცია, რომ წინა ღამეს, სპეცოპერაციის შედეგად დაიღუპა მუხროვანის ამბოხების ორგანიზებაში ეჭვმიტანილი გია კრიალაშვილი, ხოლო კობა ოთანაძე და ლევან ამირიძე დაიჭრნენ.

მუხროვანის ამბოხში ბრალდებულთა საქმის გამოძიება ცხრა თვეში დასრულდა. მოსამართლემ რეინჯერთა ბატალიონის ყოფილ მეთაურს - ლევან ამირიძეს 28 წლით, კობა ოთანაძეს - 29 წლით, მუხროვანში განთავსებული ჯავშან-სატანკო ბატალიონის ყოფილ მეთაურს - შოთა (მამუკა) გორგიაშვილს კი 19 წლით პატიმრობა მიუსაჯა. სამივე მათგანს ბრალად ედებოდა ამბოხების მომზადება ხელისუფლების დამხობის მიზნით.

დაკავებულები თავს უდანაშაულოდ მიიჩნევდნენ. ისინი ახალმა ხელისუფლებამ 2013 წლის 13 იანვარს პოლიტპატიმრების სტატუსით გაათავისუფლა. 

კომენტარები