ოლეგ ოსინოვსკი, რომელიც ახლახან ესტონურმა ბიზნესგამოცემა Äripäev-მა ესტონეთის უმდიდრეს ადამიანად დაასახელა, აცხადებს, რომ საქართველოს ჰიდროენერგეტიკაში 200 მილიონი დოლარის ინვესტიციას ჩადებს. ამის შესახებ ბიზნესმენმა ესტონურ გამოცემა Eesti Päevaleht-ს განუცხადა.
"საქართველო საუკეთესო ადგილია ჰიდროენერგეტიკაში ინვესტირებისთვის, რამდენადაც ამ ქვეყანაში 26 ათასი მდინარეა, რომლებიც მთებში იღებენ სათავეს", - განაცხადა ოსინოვსკიმ.
ბიზნესმენის თქმით, მისი კომპანია ააშენებს ოთხ ჰიდროელექტროსადგურს, რომლებიც წლიურად 100 მეგავატ ელექტროენერგიას გამოიმუშავებენ. თავად პროექტი კი, დაახლოებით 200 მილიონი დოლარი დაჯდება. "ესტონეთში ამხელა თანხის ინვესტირების შესაძლებლობა არ არის", - განაცხადა ოსინოვსკიმ.
ესტონელი ბიზნესმენის ქონება 300 მილიონ ევროდ არის შეფასებული. ოსინოვსკი ფლობს კომპანიებს - Skinest Rail, რომელიც სარკინიგზო გადაზიდვებს ახორციელებს და წარმომადგენლობა აქვს საქართველოშიც და, ასევე, Spacecom AS, რომელიც სარკინიგზო ტანკერების ლიზინგს ახორციელებს.
