რუსეთის მთავარმა სანიტარმა განაცხადა, რომ თბილისში მოქმედი ლუგარის სახელობის ლაბორატორია რუსეთისთვის საფრთეს წარმოადგენს და შესაძლოა დივერსიებისთვის იქნას გამოყენებული.
ინტერფაქსთან საუბრისას გენადი ონიშჩენკომ აღნიშნა, რომ ლუგარის ლაბორატორია „აშშ-ის სამხედრო-შეტევითი პოტენციალის მნიშვნელოვანი რგოლია“. იგი დარწმუნებულია, რომ ვაშინგტონი არღვევს საერთაშორისო კონვენციას ბიოლოგიური იარაღის შესახებ და ლაბორატორიის ნამდვილი დანიშნულება რუსეთის ტერიტორიაზე ვირუსების გავრცელების გეგმების მომზადებაა.
ონიშჩენკომ განაცხადა, რომ რუსეთის ბაზარზე ქართული პროდუქციის დაშვების რეჟიმი პირდაპირ იქნება დამოკიდებული იმაზე, გააგრძელებს თუ არა ამერიკული ლაბორატორია მუშაობას საქართველოში.
რუსეთის სხვადასხვა უწყებას არაერთხელ გამოუხატავს უკმაყოფილება საქართველოში ლუგარის სახელობის ლაბორატორიის საქმიანობის გამო.
გადაწყვეტილება საქართველოში "ცენტრალური რეფერალური ლაბორატორიის" შექმნის შესახებ 2004 წელს, სენატორ რიჩარდ ლუგარის ვიზიტის დროს იქნა მიღებული. ცენტრმა საქმიანობა ოფიციალურად 2011 წლიდან დაიწყო. შეერთებულმა შტატებმა ამ პროექტში 150 მილიონი დოლარის ინვესტირება განახორციელა. ის ბიოუსაფრთხოების დარგში რეგიონში ყველზე უკეთ აღჭურვილ კვლევით ცენტრს წარმოადგენდა. მისი ამოცანა ბიოლოგიური საფრთხეების კვლევა და მათზე დროული რეაგირება იყო.
2013 წლის 8 მაისს საქართველოს მთავრობის განკარგულების თანახმად, რიჩარდ ლუგარის სახელობის საზოგადოებრივი ჯანდაცვის ცენტრი ლიკვიდირებულად გამოცხადდა, მისი ქონება კი დაავადებათა კონტროლის ეროვნულ ცენტრს გადაეცა.
თუმცა, ონიშჩენკომ ლაბორატორიის დახურვაც ამის შემდეგაც არაერთხელ მოითხოვა, იმის მიუხედავად, რომ თბილისი მოსკოვს ლაბორატორიის შემოწმებას სთავაზობდა.
