საქართველოს პრეზიდენტი ოფიციალური facebook-გვერდის მეშვეობით, აფხაზეთში ომის დაწყების 21 წლისთავთან დაკავშირებით, აფხაზ ხალხს მიმართავს.
"უპირველეს ყოვლისა, ქედს ვიხრი ყველა იმ გმირის წინაშე, ვინც ქვეყნის ერთიანობასა და ნათელ იდეალებს შეწირა თავი; ქედს ვიხრი მათ წინაშე, ვინც უკვე 21 წელია, გმირულად უძლებს ამ დღეს დაწყებული ომის შედეგებს; ქედს ვიხრი მათ წინაშე, ვისაც დღესაც სწამს, რომ ჩვენი ერთობით აღდგება ჩვენი სამშობლოს მთლიანობა!" - ნათქვამია პრეზიდენტის განცხადებაში.
პრეზიდენტის თქმით, აფხაზეთისა და ე.წ. სამხრეთ ოსეთის მომავალი რუსეთში იწერება, თუმცა დეოკუპაცია გარდაუვალია.
"ჩემო ძვირფასებო,
ეს ომი ქართველებსა და აფხაზებს შორის არ დაწყებულა - ეს ომი თავს მოახვიეს ჩვენს ხალხს, ამიტომ ჩვენ ერთად გავიმარჯვებთ - ქართველები და აფხაზები!
აფხაზეთის და ე.წ. სამხრეთ ოსეთის მომავალი დღეს რუსეთში იწერება. ის დღესაც თამაშობს საზღვრებით და მავთულხლართებით ცდილობს ოკუპირებული ტერიტორიების ფართობის გაზრდას, მაგრამ, დარწმუნებული ვარ, ეს დროებითია და ყველაფერი შეიცვლება. მათ უბრალოდ ერთი მარტივი ჭეშმარიტება ავიწყდებათ - როგორც დღეს მოსდევს ღამე, ისე მოყვება ოკუპაციას დეოკუპაცია. ეს გარდაუვალია, მაგრამ ჩვენი სიყვარული, ძმობა და ერთობა ამ პროცესს კიდევ უფრო დააჩქარებს.
ჩემო აფხაზო ძმებო, დებო და დედებო,
ქართველებს და აფხაზებს სხვაგან წასასვლელი არ გვაქვს, ეს ჩვენი საერთო მიწაა და დღეს, როდესაც ჩვენი ქვეყნის უახლესი ისტორიის ამ უმძიმეს დღეს ვიხსენებთ, ყველაზე მეტად მსურს ვიყო იმედიანად - ჩვენ ისევ ვიქნებით ერთად! ჩვენი შვილები ერთმანეთის მხარდამხარ გაიზრდებიან და ერთად ვიამაყებთ მათი წარმატებით!
ჩვენს ხალხებს აქვთ საერთო მომავალი!" - წერს პრეზიდენტი სოციალური ქსელის ოფიციალურ გვერდზე.
სააკაშვილის განცხადებას თან ერთვის ლინკი youtube-დან, სადაც გოგონა აფხაზეთზე ლექსს კითხულობს.
