გიორგი მარგველშვილი მიიჩნევს, რომ 1 მაისის აქციაზე, რიგ შემთხვევებში, ძალადობის გამოვლენა მოხდა, პოლიციამ კი წესრიგი დაიცვა - ამის შესახებ განათლების მინისტრმა და ვიცეპრემიერმა GIPA-ში სტუდენტებთან შეხვედრისას ისაუბრა.
„ამ სტუდენტებს ვიცნობ, კარგი ურთიერთობა მაქვს და ძალიან მომწონს, ყოველ შემთხვევაში, მათ შორის არიან ლევანი და სანდრო, რომელთანაც კარგი ურთიერთობა მაქვს და მგონია, რომ კარგი ადამიანები არიან. ამასთან, ისინი მოყვნენ ვითარებაში, სადაც სახელმწიფომ უნდა დაიცვას როგორც საკუთარი მოქალაქეები, ასევე წესრიგი. იქ, რამდენადაც ვიცი, სანდრო და ლევანი არ იყვნენ ჩართულნი, მაგრამ რიგ შემთხვევებში მოხდა აგრესიის გამოვლენა", - ამბობს მარგველაშვილი.
მისივე თქმით, ქუჩაში გამომსვლელის პასუხისმგებლობა პროვოკაციის აღკვეთაცაა:
„არის ლაპარაკი, რომ იქ იყო პროვოკაცია, რაღაც დაგეგმილი იყო, მაგრამ როდესაც ქუჩაში გამოდიხარ, ვალდებული ხარ, პასუხისმგებლობა აიღო თუნდაც პროვოკაციის აღკვეთაზე. მოხდა პოლიციელების შეურაცხყოფა. დეტალები არ ვიცი, მაგრამ ერთი ვიდეო ვნახე Youtube-ზე, ერთ-ერთი ჟურნალისტი ისეთ ისტერიაშია, მგონია, რომ თავს აიფეთქებს. ესეც არანორმალურია - აბსოლუტურ ისტერიაში დასდევს პოლიციელებს და უყვირის ეს კაცი. სხვა კადრები არ მინახავს, ველაპარაკე შს მინისტრს და მან მითხრა პოლიციის შეურაცხყოფის თაობაზე, კადრებიც არის, როგორ აყენებენ შეურაცხყოფას პოლიციას -არ მგონია, რომ ეს კადრები საჯაროდ უნდა ეყაროს.
საბოლოოდ, სამწუხაროა იცით რა? ვინმემ იცის, რაზე იყო მიტინგი? მე არ ვიცი. შრომის კოდექსში ცვლილებები არ მოსწონთ? ძველი თუ არ მოსწონთ, პარლამენტში ახალი შრომის კოდექსია შესული. კარგი ადამიანები არიან ლევანიც და სანდროც და ვფიქრობ, რომ მნიშვნელოვან როლს ითამაშებენ მომვალში, მაგრამ რეალურად, პოლიტიკურ პროცესში ჩვენ ვიცით მარტო სკანდალი. შინაარსი, რის გამო იყო ეს, არავინ არ იცის", - განაცხადა გიორგი მარგველაშვილმა.