ქართული დელეგაცია, თბილისის მერის, გიგი უგულავას ხელმძღვანელობით, ოფიციალური ვიზიტით პრაღაში გაემგზავრა. დელეგაციის შემადგენლობაში მყოფ ზოგიერთ წევრს, საზღვარზე პრობლემა შეექმნა. კერძოდ, ვიცემერ დავით ალავიძეს, ასევე საკრებულოს წევრებს ირაკლი დვალსა და დავით წერეთელს, საზღვარზე არ ატარებდნენ. ინციდენტი დაახლოებით 40 წუთის შემდეგ, უშუალოდ თბილისის მერის ჩარევის შედეგად აღმოიფხვრა.
კანონის მიხედვით, სასამართლოს გადაწყვეტილების გარეშე, სასაზღვრო პოლიციას, არ აქვს უფლება პიროვნება საზღვარზე არ გაატაროს.
დელეგაციის ვიზიტი ჩეხეთის დედაქალაქში, თბილისის დღეებს უკავშირდება, რომელსაც პრაღა 22-24 აპრილს მასპინძლობს.
შეგახსენებთ, 18 აპრილს, გაზეთ ალიაში გამოქვეყნდა ინფორმაცია, იმის შესახებ, რომ 19 აპრილს თბილისის მერი და მისი თანხმლები პირები გაქცევისთვის ემზადებოდნენ.
რის შემდეგაც, თბილისის მერიამ განცხადება გაავრცელა, სადაც განმარტებულია, რომ გავრცელებული ინფორმაცია ვიზიტის პოლიტიკურ დატვირთვასთან დაკავშირებით, არასწორია და თბილისის დელეგაციის ვიზიტი პრაღაში საერთაშორისო კულტურული ღონისძიების ნაწილია, ’’იმართება ორმხრივი ხელშეკრულების საფუძველზე, არ გააჩნია რაიმე პოლიტიკური დატვირთვა და არანაირად არ უკავშირდება 19 აპრილს დაგეგმილ აქციას’’.
