კომერციული ბანკების მიერ გაცემული კრედიტების რაოდენობა შემცირდა. ეროვნული ბანკის მიერ გამოქვეყნებული სტატისტიკური მონაცემები აჩვენებს, რომ კრედიტების მთლიანმა მოცულობამ 2013 წლის იანვარში, წინა წლის დეკემბერთან შედარებით, 45.5 მილიონი ლარით ანუ 0.5%-ით დაიკლო. აქედან, ეროვნული ვალუტით გაცემული სესხები - 1.1%-ით, ხოლო უცხოური ვალუტით გაცემული სესხები - 0.3%-ით შემცირდა.
სესხების კლება ძირითადად იურიდიულ პირებზე გაცემული სესხების ხარჯზე მოხდა. 2013 წლის იანვრის ბოლოს თუ ფიზიკურ პირებზე გაცემული სესხების მოცულობა 0.1%-ით გაიზარდა, იურიდიული პირებისთვის 5.5%-ით შემცირდა. ამასთან, იურიდიულ პირებზე გაცემული სესხების 77.3% მხოლოდ სამ დარგზე - მრეწველობაზე, მშენებლობასა და ვაჭრობაზე მოდის. 2013 წლის თებერვლის მდგომარეობით, გაზრდილია მხოლოდ ვაჭრობის სფეროზე გაცემული სესხების რაოდენობა - 0.04%-ით. მრეწველობასა და ვაჭრობაზე გაცემული სესხების წილი, შესაბამისად, 1.1%-ით და 3.5%-ით არის შემცირებული.