ახალგაზრდა იურისტთა ასოციაციის თავმჯდომარე, კახა კოჟორიძე, ეროვნულ ბიბლიოთეკასთან განვითარებულ მოვლენებს გამოეხმაურა.
როგორც საია-ს თავმჯდომარემ სააგენტო ინტერპრესნიუსს განუცხადა, შსს-ს მეტი მობილიზება უნდა მოეხდინა.
"შეიძლება იმაზე საუბარი, რომ პოლიციელების მხრიდან მეტი მობილიზება იყოს საჭირო. სამართალდამცავი უწყების მოვალეობაა, რომ სამართალდარღვევის პრევენცია მოახდინოს და შესაბამისი ღონისძიებები წინასწარ გაატაროს, საქართველოში ამის ვალდებულება აქვს შსს-ს", - აღნიშნა კახა კოჟორიძემ.
მისივე თქმით, არსებობს ზღვარი თავისუფალი აზრის გამოხატვასა და სამართალდარღვევას შორის.
"პოლიციას ყველაფერი უნდა გაეკეთებინა, რომ აქ მოსულ სტუმრებს შენობაში შესვლის პრობლემა არ შექმნოდათ. ერთია, როცა რაღაცას აპროტესტებ, თუმცა ზღვარი უნდა არსებობდეს - სად მთავრდება თავისუფალი აზრის გამოხატვის უფლება და იწყება სამართალდარღვევა", - აღნიშნა კოჟორიძემ.
შეგახსენებთ, ეროვნულ ბიბლიოთეკასთან თბილისის მერისა და საპარლამენტო უმცირესობის წევრების ცემის გამო, პრეზიდენტი სააკაშვილი მოსახლეობას წლიური მოხსენებით, ბიბლიოთეკის ნაცვლად, პრეზიდენტის სასახლიდან მიმართავს.