ომბუდსმენი პროკურატურის მიერ ფარული ჩანაწერების განსაჯაროებას ეხმაურება, სახალხო დამცველის განცხადებით: ”პროკურატურის მიერ განცხადების გავრცელებასთან ერთად, სხვადასხვა მედიასაშუალებებმა გაავრცელეს საქმესთან დაკავშირებული პირების სექსუალური ცხოვრების ამსახველი ფარული ვიდეომასალა, რომელიც მათ საქართველოს პროკურატურამ გადასცა. პირადი ცხოვრების უფლება დაცულია, როგორც ადამიანის უფლებათა ევროპული კონვენციის მე-8 და სამოქალაქო-პოლიტიკური უფლებების შესახებ საერთაშორისო პაქტის მე-17 მუხლებით, ასევე საქართველოს კონსტიტუციის მე-20 მუხლით. მიუხედავად ამ უფლების არააბსოლუტური ხასიათისა, სახელმწიფომ ჩარევის შემთხვევაში უნდა იხელმძღვანელოს პროპორციულობის პრინციპით და განსაზღვროს თუ რამდენად აუცილებელია ჩარევა დემოკრატიულ საზოგადოებაში”, - ნათქვამია განცხადებაში.
ომბუდსმენის თქმით, ”მიუხედავად იმისა, რომ გავრცელებულ ვიდეომასალაში გამოყენებულია დაფარვის საშუალებები, აღნიშნული საშუალებების გამოყენება მისი ხარისხიდან გამომდინარე ვერ უზრუნველყოფს გადაღებული პირების იდენტიფიცირებისგან სრულ დაცვას. ვიდეომასალაში შესაძლებელია გადაღებული პირების ისეთი საიდენტიფიკაციო ფაქტორების გარჩევა, როგორიც არის ადამიანის აღნაგობა, თმის ფერი და ტანსაცმელი, რაც შეიძლება საზოგადოების გარკვეული ნაწილისთვის იძლეოდეს აღნიშნული პირების იდენტიფიცირების საშუალებას. ზემოთ მითითებული ვიდეომასალის ჩვენება წარმოშობს გადაღებული პირების იდენტიფიცირების გარკვეულ რისკს, რაც ეჭვის ქვეშ აყენებს მათი პირადი ცხოვრების ხელშეუხებლობის დაცვას. გასაგებია, რომ მსგავს სისხლის სამართლის საქმეებზე შესაძლოა არსებობდეს საზოგადოების მომეტებული ინტერესი, თუმცა აღნიშნული ლეგიტიმური მოთხოვნის დაკმაყოფილება არ უნდა ხდებოდეს სხვათა პირადი ცხოვრების ხელშეუხებლობის დარღვევის ხარჯზე”, - ნათქვამია განცხადებაში.
სახალხო დამცველი მოუწოდებს საქართველოს პროკურატურას და მედიასაშუალებებს, განსაკუთრებული სიფრთხილით მოეკიდონ ისეთი ინფორმაციის გავრცელებას, რომელმაც შეიძლება ზიანი მიაყენოს პირის პირად ცხოვრებას. ომბუდსმენი ასევე მიმართავს საქართველოს მთავარ პროკურატურას, ეფექტური ღონისძიებები გაატაროს ზემოაღნიშნულ საქმეზე ჭეშმარიტების დადგენის მიზნით.
