თბილისის მერიის მიერ გავრცელებულ ინფორმაციას და აუდიოჩანაწერს შალვა რამიშვილი აბსურდულს უწოდებს. აუდიოჩანაწერში თავად შალვა რამიშვილი და ჟურნალისტი ნანა ლეჟავაც ფიგურირებენ.
,,ეს იგივეა, მე რომ გავარცელო ინფორმაცია, რომ ხელთ მაქვს ჩანაწერი, სადაც ვიღაც ადამიანი, რომლის სახელს და გვარს არ ვიტყვი, ჰყვება თუ როგორ დაინახა გიგი უგულავა ცირკის მიმდებარე ტერიტორიაზე და ვაჭრობდა სხეულით’’, - აცხადებს შალვა რამიშვილი.
შეგახსენებთ, მერიის პრესსპიკერმა ბაჩო დოლიძემ სპეციალური განცხადება გააკეთა და აღნიშნა, რომ შპს ჰერმესთან დაკავშირებით მოსალოდნელია პროვოკაცია. როგორც ბაჩო დოლიძე აცხადებს, მოსალოდნელი პროვოკაციის შესახებ მერიას შპს ჰერმესის ყოფილმა თანამშრომელმა მიაწოდა ინფორმაცია და აუდიოჩანაწერი.
,,აუდიოჩანაწერიდან ჩანს, რომ რომ შპს ჰერმესის საქმიანობის შესახებ ცრუ ინფორმაციის გავრცელება იგეგმება, თითქოს აღნიშნული შპს-ის მიერ ხალხის კუთვნილი სასაფლაოების გადაყიდვა და ჭირისუფლის მიერ მომსახურებისთვის გადახდილი თანხის პირად ანგარიშებზე ჩარიცხვა ხდება. ასევე, მიზნის მისაღწევად დაგეგმილია თამნამშრომლების წინააღმდეგ პროვოკაციის მოწყობა და მხოლოდ ჟურნალისტის მიერ გადასაღებად მათთვის თანხის შეთავაზება. მოწოდებული ინფორმაციით, ქალაქის მერის პოლიტიკური დისკრედიტაციის მიზნით, გარკვეული პირების, მათ შორის ჟურნალისტების მხრიდან, უკანონო ქმედებების ჩადენაა მოსალოდნელი, რომლის მიზანი საზოგადოების შეცდომაში შეყვანის გზით, მასობრივი აქციების ორგანიზება და საზოგადოებრივი მღელვარების პროვოცირებაა’’, - განაცხადა ბაჩო დოლიძემ.
დოლიძის თქმით, მსგავსი გეგმა იმავე პირების მიერ, ავტობუსების მძღოლების აქციების პროვოცირების დროს, უკვე განხორციელდა. თბილისის მერია მოუწოდებს მოსახლეობას, არ ენდონ ამ შინაარსის ცნობებს.
