შინაგან საქმეთა მინისტრის პოსტზე ირაკლი ღარიბაშვილის პირველი ნაბიჯი სოდ-ისა და კუდ-ის გაუქმება იქნება. ამის შესახებ მინისტრობის კანდიდატმა ტელეკომპანია რუსთავი 2-ის ეთერში განაცხადა. მისი თქმით, სწორედ ამ სტრუქტურების გაუქმება „საზოგადოების დაკვეთას“ წარმოადგენს.
ღარიბაშვილის განმარტებით, კონსტიტუციური უსაფრთხოების დეპარტამენტის ფუნქციების ნაწილი ახალ სტრუქტურას - სახელმწიფო უსაფრთხოების დეპარტამენტს გადაეცემა. ფუნქციების მეორე ნაწილი - სპეციალურად შექმნილ ანტიკორუფციულ სააგენტოს.
სპეციალური ოპერატიული დეპარტამენტის ფუნქციები კი კრიმინალურ პოლიციას გადაეცემა.
ღარიბაშვილის განცხადებით, მისი ერთ-ერთი მთავარი ამოცანა უწყების „დეპოლიტიზაცია“ იქნება. მისი თქმით, პოლიციის თანამშრომლები „პოლიტიკური დაკვეთებისგან თავისუფლები უნდა იყვნენ და არ უნდა იყონ ზეწოლის მსხვერპლნი“. მინისტრობის კანდიდატმა ასევე განაცხადა, რომ კრიმინალის მიმართ „შეურიგებელი იქნება“.
