C ჯგუფის პირველი თამაში, რომელშიც ბოლო ორი მსოფლიო ჩემპიონატის გამარჯვებული დაუპირისპირდა ერთმანეთს, ევრო 2012-ზე გამართული მატჩებიდან საუკეთესო გამოდგა.
იტალიის და ესპანეთის ნაკრებთა 30-ე დაპირისპირებას გდანსკის PGA არენამ უმასპინძლა. საინტერესოა, რომ ესპანელებმა სკუადრა აძურას დამარცხება ოფიციალურ მატჩში კვლავ ვერ შეძლეს: მსოფლიოს და ევროპის ჩემპიონატებზე, ასევე საკვალიფიკაციო ტურნირებში პირენეელები მეთხუთმეტედ დაუპირისპირდნენ აპენინელებს და კვლავ ვერ იმარჯვეს.
იტალიის ნაკრებმა, რომელმაც ევროპირველობის დაწყებამდე ზედიზედ სამი ამხანაგური შეხვედრა წააგო, მოულოდნელად კარგად ითამაშა და ვისენტე დელ ბოსკეს უნაკლო ესპანეთთან ქულები გაიყო - 1:1.
მსოფლიოს 2006 და 2010 წლების ჩემპიონები ევრო 2008-ზეც შეხვდნენ ერთმანეთს. მაშინ ესპანეთის ნაკრებმა სკუადრა აძურა პენალტების სერიაში დაამარცხა და ნახევარფინალში გავიდა. ავსტრია-შვეიცარიაში იტალია იყო ერთადერთი გუნდი, რომელსაც ესპანელებმა ვერ მოუგეს.
თამაში, რომელსაც უეფას პრეზიდენტის მიშელ პლატინის გარდა ესპანეთის სამეფო ოჯახის წევრებიც დაესწრნენ, დელ ბოსკეს გუნდის უპირატესობით დაიწყო: მე-9 წუთზე დავიდ სილვას დარტყმული ბურთი ჯანლუიჯი ბუფონის კარს გადაცდა, კიდევ ცოტა ხანში კი მანჩესტერ სიტის ნახევარმცველმა მეორე კარგი მომენტი ვერ გამოიყენა.
მე-12 წუთზე ევროპის ჩემპიონი ესპანეთის კარში საჯარიმო დარტყმა დაინიშნა: მსაჯმა სერხიო რამოსი ანტონიო კასანოსთან უხეშობისთვის დააჯარიმა. სტანდარტული მდგომარეობა ანდრეა პირლომ შეასრულა - იკერ კასილიასმა იუვენტუსის ლიდერის სახიფათო დარტყმა მოიგერია.
22-ე წუთზე ჩეზარე პრანდელის გუნდს არ გაუმართლა: ანტონიო კასანოს დარტყმული ბურთი ესპანელთა კარს სანტიმეტრებით აცდა. კიდევ ცოტა ხანში ანდრეს ინიესტამ გაიბრწყინა - ბარსელონას ნახევარმცველმა, რომელიც ამ მატჩში ერთ-ერთი საუკეთესო იყო, ლამაზად შეუტია და დაარტყა, მაგრამ ჯანლუიჯი ბუფონმა ბურთი მოიგერია.
34-ე წუთზე ანდრეა პირლომ შესანიშნავი პასით კასანო მოძებნა, მილანის თავდამსხმელი საჯარიმოში შეიჭრა და სახიფათოდ დაარტყა. კასილიასმა ბურთი ცუდად მოიგერია, მაგრამ დამატებაზე მარიო ბალოტელიმ წესები დაარღვია და მსაჯმაც იტალიელთა შეტევა შეაჩერა. რამდენიმე წუთში კასანომ მარკიზიოს ჩააწოდა ბურთი, იუვენტუსის ნახევარმცველმა შეუჩერებლად კი დაარტყა, მაგრამ ესპანელთა მეკარემ საიმედოდ ითამაშა.
ტაიმის ბოლო წუთებზე მეტოქეებმა რეალური საგოლე მომენტები ვერ გამოიყენეს: ჯერ ანდრეს ინიესტამ ახლო მანძილიდან გადააცილა ბურთი ბუფონის კარს, რამდენიმე წამში კი ესპანელთა მცველებს საჯარიმოში ტიაგო მოტა უმეთვალყურეოდ დარჩათ - მისი ძალიან სახიფათო თავური დარტყმა კასილიასმა მოიგერია.
შესვენების შემდეგ თამაშის ტემპმა იმატა: იტალიელთა კაპიტანმა ჯანლუიჯი ბუფონმა ჯერ სესკ ფაბრეგასის, შემდეგ კი ინიესტას სახიფათო დარტყმები მოიგერია, 54-ე წუთზე კი მარიო ბალოტელიმ გაუშვა ანგარიშის გახსნის რეალური შანსი. ფლანგზე სერხიო რამოსს აართვა ბურთი და ესპანელთა საჯარიმოში შეიჭრა, თუმცა იმავე რამოსმა შეცდომა გამოასწორა - წამოეწია ბალოტელის და ბურთი აართვა.
მანჩესტერ სიტის თავდამსხმელი პრანდელიმ მალე ვეტერანი ანტონიო დი ნატალეთი შეცვალა. 34 წლის ფორვარდმა, რომელიც ამ ევროპის ჩემპიონატის შემდეგ კარიერას ასრულებს, რამდენიმე წუთში გოლიც გაიტანა: ანდრეა პირლოს ბრწყინვალე პასის შემდეგ პიკე ჩამოიტოვა, საჯარიმოში შეიჭრა და ესპანელთა კარი დალაშქრა - 1:0.
დელ ბოსკეს გუნდმა მალევე გაათანაბრა: დავიდ სილვამ ბრწყინვალე პასით ბუფონთან პირისპირ დატოვა ფაბრეგასი და სესკმაც შანსი ხელიდან არ გაუშვა - 1:1.
76-ე წუთზე ესპანელებს დაწინაურებაც შეეძლოთ, მაგრამ მეკარესთან პირისპირ გასულ ფერნანდო ტორესს ბუფონმა დარტყმა არ აცალა და ბურთი აართვა. ლონდონის ჩელსის ფორვარდს თამაშის მიწურულს კიდევ ჰქონდა საგოლე შანსი - მეკარეს ბურთი თავზე გადაუგდო, მაგრამ დარტყმა ძლიერი გამოუვიდა და კარს საერთოდ ააცილა.
89-ე წუთზე იუვენტუსის შუახაზელმა კლაუდიო მარკიზიომ ვერ გამოიყენა ძალიან კარგი საგოლე შანსი - საჯარიმოში შეჭრილმა ძლიერად ვერ დაარტყა. ესპანელთა კაპიტანმა კასილიასმა საიმედოდ ითამაშა.
მსაჯის მიერ დამატებული დროის პირველ წუთზე ხაბი ალონსოს არ გაუმართლა: ხავის პასის შემდეგ ძლიერად კი დაარტყა, მაგრამ არაზუსტად. ეს იყო ამ ლამაზი და დაძაბული შეხვედრის უკანასკნელი საინტერესო მომენტი.
„ყველაზე ძალიან გული იმაზე მწყდება, რომ მეტოქეს მალე მივეცით ანგარიშის გათანაბრების შანსი. ცოტა უფრო ყურადღებით რომ გვეთამაშა, დარწმუნებული ვარ მოვიგებდით,“ - განაცხადა სკუადრა აძურას მწვრთნელმა ჩეზარე პრანდელიმ.
„რა თქმა უნდა მოგება გვინდოდა - ეს არცაა დასამალი, მაგრამ ვერ ვიტყვი, რომ ახლა გულდაწყვეტილი ვარ. ჩვენ კარგად ვითამაშეთ, ქულა მოვიპოვეთ ძლიერ გუნდთან, ასეთ დროს კი ცუდ ხასიათზე არ უნდა იყო,“ - ეს უკვე ესპანელთა თავკაცი ვისენტე დელ ბოსკეა.
მომდევნო ტურში, რომელიც 14 ივნისს გაიმართება, იტალია ხორვატიას შეხვდება, ესპანეთი კი ირლანდიის დამარცხებას შეეცდება.
10 ივნისი, 2012. ევრო 2012 – C ჯგუფი, I ტური. გდანსკი, PGA არენა, 38869
ესპანეთი 1:1 იტალია
გოლები: 0:1 ა.დი ნატალე (61), 1:1 ს.ფაბრეგასი (65)
ესპანეთი: ი.კასილიასი (კაპ), ა.არბელოა, ხ.პიკე, ს.რამოსი, ხ.ალაბა, ს.ბუსკეტსი, ხ.ალონსო, ხავი, ს.ფაბრეგასი (ფ.ტორესი 74), ა.ინიესტა, დ.სილვა (ხ.ნავასი 64)
მწვრთნელი: ვისენტე დელ ბოსკე
იტალია: ჯ.ბუფონი (კაპ), კ.მაჯიო, დ.დე როსი, ე.ჯაკერინი, ჯ.კიელინი, ლ.ბონუჩი, ა.პირლო, კ.მარკიზიო, ტ.მოტა (ა.ნოჩერინო 90), ა.კასანო (ს.ჯოვინკო 65), მ.ბალოტელი (ა.დი ნატალე 56)
მწვრთნელი: ჩეზარე პრანდელი
გაფრთხილება: მ.ბალოტელი, ლ.ბონუჩი, ხ.ალაბა, ჯ.კიელინი, ა.არბელოა, კ.მაჯიო
მსაჯები: ვ.კაშაი (უნგრეთი); გ.ერიოში (უნგრეთი), გ.რინგი (უნგრეთი)
